വാഷിങ്ടണ്‍: അമേരിക്കന്‍ പ്രസിഡന്റ് തെരഞ്ഞെടുപ്പില്‍ റിപ്പബ്ലിക്കന്‍ പാര്‍ട്ടിയുടെ പ്രസിഡന്റ് സ്ഥാനാര്‍ഥി ഡൊണാള്‍ഡ് ട്രംപ് തന്നെ. സ്ഥാനാര്‍ഥിയാകാന്‍ വേണ്ട 1,237 പ്രതിനിധികളുടെ പിന്തുണ ട്രംപ് ഉറപ്പാക്കിയെന്നാണ് റിപ്പോര്‍ട്ടുകള്‍.
ജൂലൈയില്‍ നടക്കുന്ന ദേശീയ കണ്‍വന്‍ഷനിലായിരിക്കും സ്ഥാനാര്‍ഥിയെ ഔദ്യോഗികമായി പ്രഖ്യാപിക്കുക. റിപ്പബ്ലിക്കന്‍ പാര്‍ട്ടിയിലെ 16 പേരെ പിന്തള്ളിയാണ് ട്രംപ് ഒന്നാമതെത്തിയിരിക്കുന്നത്. ഡെമോക്രാറ്റിക് പാര്‍ട്ടിയിലെ ഹിലാരി ക്ലിന്റനെയോ ബേണി സാന്‍ഡേഴ്‌സനെയോ ആയിരിക്കും ട്രംപ് നേരിടുക.
കഴിഞ്ഞദിവസം വാഷിങ്ടണ്‍ പ്രൈമറി ജയിച്ച ട്രംപിനു സ്ഥാനാര്‍ഥിത്വത്തിനായി നാലുപേരുടെ പിന്തുണകൂടി ആവശ്യമായിരുന്നു. തുടക്കത്തില്‍ തീരുമാനമെടുക്കാതിരുന്ന അഞ്ചു പ്രതിനിധികള്‍ പിന്നീട് ട്രംപിനെ പിന്തുണയ്ക്കുമെന്നറിയിച്ചു രംഗത്തെത്തിയതോടെയാണ് അദ്ദേഹം സ്ഥാനാര്‍ഥിത്വം ഉറപ്പിച്ചത്.
വിവാദങ്ങളില്‍നിന്നു വിവാദങ്ങളിലേക്കു പോകുന്ന ട്രംപ്, താന്‍ അമേരിക്കയുടെ പ്രസിഡന്റായാല്‍ ചൈന അമേരിക്കയോടു മാന്യമായി പെരുമാറുമെന്നും അല്ലെങ്കില്‍ ചൈനയെ ശരിയാക്കുമെന്നും കഴിഞ്ഞ ദിവസം പ്രസ്താവിച്ചിരുന്നു.