കാസര്‍കോട്: ജില്ലയില്‍ റോഡപകടത്തില്‍ മരണപ്പെടുന്നവരുടെ എണ്ണം വര്‍ധിക്കുന്നതായി മോട്ടോര്‍ വാഹന വകുപ്പ്. കഴിഞ്ഞ വര്‍ഷം ജില്ലയില്‍ 120 ജീവനുകളാണ് പൊലിഞ്ഞത്. ഇതില്‍ 41 പേര്‍ യുവാക്കളാണെന്നതാണ് ഞെട്ടിപ്പിക്കുന്ന വസ്തുത.
കഴിഞ്ഞ വര്‍ഷം 104 പേരാണ് മരണപ്പെട്ടത്. 903 വാഹനപകടങ്ങളിലായി 1159 പേര്‍ക്ക് പരുക്കേറ്റു. കഴിഞ്ഞ വര്‍ഷം 976 റോഡപകടങ്ങളാണ് ജില്ലയില്‍ സംഭവിച്ചത്.
2010 മുതല്‍ 2016 വരെ 720 പേര്‍ മരിച്ചതായി വാഹന വകുപ്പിന്റെ റിപോര്‍ട്ടില്‍ പറയുന്നു. 5840 അപകടങ്ങളില്‍ 7485 പേര്‍ക്ക്് പരുക്കേറ്റു. പലരും ഗുരുതര പരുക്കുമായി ശരീരം അനങ്ങാനാവാതെ ഇപ്പോഴും ജീവിതം തള്ളിക്കുന്ന അവസ്ഥയുമുണ്ട്.
അശ്രദ്ധയും അമിത വേഗതയുമാണ് അപകടങ്ങള്‍ക്ക്് വഴിവക്കുന്നതെന്നാണ് മോട്ടോര്‍ വാഹന വകുപ്പ് അധികൃതര്‍ പറയുന്നത്. കാഞ്ഞങ്ങാട് കാസര്‍കോട് സംസ്ഥാന പാതയില്‍ അമിത വേഗത്തിലോടുന്നതു കാരണമാണ് അപകടങ്ങള്‍ സംഭവിച്ചതെന്ന് അധികൃതര്‍ ചൂണ്ടി കാട്ടുന്നു.
20 ഓളം പേരാണ് കഴിഞ്ഞ വര്‍ഷം ഈ പാതയില്‍ മരണപ്പെട്ടത്. മദ്യപാനം, അപകടമായ രീതിയില്‍ വാഹനമോടിക്കുക, മൊബൈല്‍ ഫോണ്‍ സംഭാഷണം ഇവയാണ് പല അപകടങ്ങള്‍ക്കും കാരണം.
ബോധവല്‍ക്കരണത്തിനായി ജനങ്ങളും പൊലിസും രാഷ്ട്രീയ പാര്‍ട്ടി നേതാക്കളും ഒരുമിച്ച് നില്‍ക്കണമെന്നാണ് അധികൃതര്‍ പറയുന്നത്. ഇതിനായി ജില്ലയിലെ വാഹന വകുപ്പ് എവിടെ വേണമെങ്കിലും പരിപാടികള്‍ അവതരിപ്പിക്കാന്‍ അധികൃതര്‍ തയ്യാറാണ്.