ഭുവനേശ്വര്‍: ഒഡിഷയില്‍ പൊലിസ് വാഹനത്തിനു നേരെയുണ്ടായ മാവോയിസ്റ്റ് ആക്രമണത്തില്‍ ഏഴ് പൊലിസുകാര്‍ കൊല്ലപ്പെട്ടു. രാപുത് ജില്ലയിലെ സുന്‍കി ഹില്ലിലായിരുന്നു സംഭവം. സ്‌ഫോടനത്തില്‍ ആറ് പൊലിസുകാര്‍ക്ക് പരുക്കേറ്റു. നാല് പൊലിസുകാര്‍ സംഭവം നടന്ന ഉടനെയും ബാക്കിയുള്ളവര്‍ ആശുപത്രിയില്‍ വെച്ചുമാണ് മരിച്ചത്.

മാവോയിസ്റ്റുകള്‍ റോഡില്‍ സ്ഥാപിച്ച കുഴിബോംബ് പൊട്ടിത്തെറിക്കുകയായിരുന്നു. ഭുവനേശ്വറില്‍ പരിശീലനത്തിനായി പോകുകയായിരുന്നു പൊലിസുകാര്‍. ഇവര്‍ സഞ്ചരിച്ച മിനിബസില്‍ 12 പൊലിസുകാരും ഒരു സിവിലിയനുമാണ് ഉണ്ടായിരുന്നത്. സ്‌ഫോടനം നടന്ന സ്ഥലത്ത് ഏഴടി താഴ്ച്ചയില്‍ ഗര്‍ത്തം രൂപപ്പെട്ടു.