കോട്ടയം: ട്രെയിന്‍ വൈകിയോടിയതില്‍ പ്രതിഷേധിച്ച് തിരുവനന്തപുരം- ഷൊര്‍ണൂര്‍ വേണാട് എക്‌സ്പ്രസ് കോട്ടയം റെയില്‍വേ സ്‌റ്റേഷനില്‍ യാത്രക്കാര്‍ ഒരു മണിക്കൂറോളം തടഞ്ഞിട്ടു. ഇന്നലെ രാവിലെ 9.15നാണു സംഭവം.
കോട്ടയം സ്‌റ്റേഷനില്‍ നിന്ന് പുറപ്പെട്ടു ഏതാനും മീറ്ററുകള്‍ നീങ്ങിക്കഴിഞ്ഞപ്പോള്‍ യാത്രക്കാര്‍ ചങ്ങല വലിച്ചു ട്രെയിന്‍ നിര്‍ത്തുകയായിരുന്നു. തുടര്‍ന്നു യാത്രക്കാര്‍ എന്‍ജിനു മുന്നില്‍ കയറി നില്‍ക്കുകയും റെയില്‍പാളത്തില്‍ കുത്തിയിരിക്കുകയും ചെയ്തു. മണിക്കൂറുളോളം വേണാട് എക്‌സ്പ്രസ് വൈകി ഓടിക്കുകയും ചെന്നൈ മെയില്‍ കടന്നു പോകുന്നതിനായി കോട്ടയം, ഏറ്റുമാനൂര്‍ സ്റ്റേഷനുകളില്‍ പിടിച്ചിടുകയും ചെയ്യുന്നതില്‍ പ്രതിഷേധിച്ചായിരുന്നു യാത്രക്കാര്‍ ട്രെയിന്‍ തടഞ്ഞത്.
പ്രതിഷേധം ശക്തമായതോടെ, എസ്.ഐ ബിന്‍സ് ജോസഫിന്റെ നേതൃത്വത്തിലുള്ള റെയില്‍വേ പൊലിസ് സ്ഥലത്തെത്തി സമരക്കാരുമായി സംസാരിച്ചു. പരിഹാരമാവാതെ പിന്‍മാറില്ലെന്നായി യാത്രക്കാര്‍. തുടര്‍ന്ന് കോട്ടയം സ്‌റ്റേഷന്‍ മാനേജര്‍ സലീം സ്ഥലത്തെത്തി പ്രതിഷേധക്കാരുമായി ചര്‍ച്ച നടത്തി. അനുകൂല നിലപാട് സ്വീകരിക്കാമെന്നു അദ്ദേഹം ഉറപ്പു നല്‍കിയതോടെയാണു പ്രതിഷേധക്കാര്‍ പിന്‍വാങ്ങിയത്. 10.30ഓടെയാണ് വേണാട് എക്‌സ്പ്രസ് യാത്ര തുടര്‍ന്നത്.