ജിദ്ദ: സഊദിയില്‍നിന്നു പുതുതായി തിരുവനന്തപുരത്തേക്ക് ആരംഭിക്കുന്ന സഊദി എയര്‍ലൈന്‍സിന്റെ ബുക്കിങ് ആരംഭിച്ചു. ഏപ്രില്‍ ഒന്നുമുതലാണ് ജിദ്ദയില്‍നിന്നും റിയാദില്‍ നിന്നും സഊദി എയര്‍ലൈന്‍സ് നേരിട്ട് തിരുവനന്തപുരത്തേക്ക് സര്‍വിസ് ആരംഭിക്കുന്നത്.
ജിദ്ദയില്‍നിന്ന് വ്യാഴാഴ്ചയും ശനിയാഴ്ചയുമായിരിക്കും തുടക്കത്തില്‍ സര്‍വിസ് നടത്തുക. റിയാദില്‍നിന്നു ഞായര്‍, ചൊവ്വ, വെള്ളി ദിവസങ്ങളിലുമായിരിക്കും സര്‍വിസ്.
ഇതേ ദിവസങ്ങളില്‍ തന്നെയായിരിക്കും തിരുവനന്തപുരത്തുനിന്ന് സഊദിയിലേക്കു തിരിച്ചുള്ള സര്‍വിസും. പുലര്‍ച്ചെ 3.50നു പുറപ്പെടുന്ന എസ്.വി 751 വിമാനം ഉച്ചയ്ക്ക് 12ന് തിരുവനന്തപുരത്തെത്തും. തിരിച്ച് എസ്.വി 752 വിമാനം 1.30നു പുറപ്പെട്ട് വൈകിട്ട് 4.45ന് ജിദ്ദയിലെത്തും വിധമാണ് സര്‍വിസ് ഷെഡ്യൂള്‍ ചെയ്തിരിക്കുന്നത്. 277 പേര്‍ക്ക് യാത്രചെയ്യാവുന്ന എയര്‍ ബസ് എ 330300 വിമാനമാണ് സര്‍വിസിന് ഉപയോഗിക്കുക.
ഇതോടെ കേരളത്തിലെ തെക്കന്‍ ജില്ലക്കാരായ പ്രവാസികളുടെ ചിരകാലാഭിലാഷമാണു സാക്ഷാല്‍ക്കരിക്കപ്പെടുക. നിലവില്‍ ജിദ്ദയില്‍നിന്ന് ഒരു എയര്‍ലൈന്‍സും നേരിട്ട് തിരുവനന്തപുരത്തേക്ക് സര്‍വിസ് നടത്തുന്നില്ല.