വാടാനപ്പള്ളി: ഏങ്ങണ്ടിയൂര്‍ പൊക്കുളങ്ങരയില്‍ കൊല്ലപ്പെട്ട സി.പി.എം പ്രവര്‍ത്തകന്‍ ചെമ്പന്‍ ശശികുമാറിന് കണ്ണീരില്‍ കുതിര്‍ന്ന അന്ത്യാഞ്ജലി. സുഹൃത്തുക്കളും പാര്‍ട്ടി പ്രവര്‍ത്തകരും ഇടത് നേതാക്കളും നാട്ടുകാരും ഉള്‍പ്പടെ വന്‍ ജനക്കൂട്ടം ശശികുമാറിന് ആദരാഞ്ജലി അര്‍പ്പിക്കാനും അവസാനമായി ഒരു നോക്കുകാണാനായി പൊക്കുളങ്ങരയിലെ വീട്ടിലെത്തിയത്. പോസ്റ്റുമോര്‍ട്ടത്തിനു ശേശം മൂന്നു മണിയോടെ  ആംബുലന്‍സില്‍ പൊക്കുളങ്ങര സെന്ററില്‍ കൊണ്ടുവന്ന മൃതദേഹം തുടര്‍ന്ന് നാട്ടുകാരും സഹപ്രവര്‍ത്തകരും വിലാപയാത്രയായി പൊക്കുളങ്ങര ബീച്ചിലെ വീട്ടിലെത്തിച്ചു.
 പി.കെ ബിജു എം.പി, നിയുക്ത എം.എല്‍.എമാരായ കെ.വി അബ്ദുള്‍ഖാദര്‍, കെ.രാജന്‍, ഗീതാഗോപി, പ്രൊഫ.കെ.യു അരുണന്‍, മുരളി പെരുനെല്ലി, ബി.ഡി ദേവസി, ഇടതു മുന്നണി നേതാക്കളായ ബേബി ജോണ്‍, കെ.പി രാജേന്ദ്രന്‍, ബാബു.എം.പാലിശേരി, സി.പി.എം ജില്ലാ സെക്രട്ടറി കെ.രാധാകൃഷ്ണന്‍, സി.പി.ഐ ജില്ലാ സെക്രട്ടറി കെ.കെ വത്സരാജ്, നാട്ടികാ ഏരിയാ സെക്രട്ടറി പി.കെ അഹമ്മദ് തുടങ്ങിയവര്‍ ശശികുമാറിന് ആദരാഞ്ജലികള്‍ അര്‍പ്പിക്കാനെത്തി. പൊതുദര്‍ശനത്തിന് ശേഷം ശശികുമാറിന്റെ മൃതദേഹം വീട്ടുവളപ്പില്‍ വന്‍ ജനാവലിയുടെ സാന്നിധ്യത്തില്‍ സംസ്‌കരിച്ചു.