ഹൈദരാബാദ്: സയ്യിദ് മുഷ്താഖ് അലി ടി20 പോരാട്ടത്തില്‍ കേരളം പൊരുതിത്തോറ്റു. ഹൈദരാബാദിനോട് പത്ത് റണ്‍സിനാണ് കേരളം പരാജയം ഏറ്റുവാങ്ങിയത്. ആദ്യം ബാറ്റ് ചെയ്ത ഹൈദരാബാദ് നിശ്ചിത 20 ഓവറില്‍ അഞ്ച് വിക്കറ്റ് നഷ്ടത്തില്‍ 168 റണ്‍സെടുത്തപ്പോള്‍ കേരളത്തിന് 20 ഓവറില്‍ ഏഴ് വിക്കറ്റ് നഷ്ടത്തില്‍ 158 റണ്‍സെടുക്കാനെ സാധിച്ചുള്ളു. 50 പന്തില്‍ ഏഴ് ഫോറും രണ്ട് സിക്‌സും പറത്തി 79 റണ്‍സെടുത്ത് ക്യാപ്റ്റന്‍ സച്ചിന്‍ ബേബി ഒരറ്റത്ത് പൊരുതിയെങ്കിലും താരത്തിനും ടീമിനെ വിജയത്തിലെത്തിക്കാന്‍ സാധിച്ചില്ല. വിഷ്ണു വിനോദ് (22), രോഹന്‍ പ്രേം (22) എന്നിവരും ഭേദപ്പെട്ട പ്രകടനം പുറത്തെടുത്തു. മറ്റൊരു താരത്തിനും രണ്ടക്കം തികയ്ക്കാന്‍ സാധിച്ചില്ല.
നേരത്തെ ടോസ് നേടി കേരളം ഹൈദരാബാദിനെ ബാറ്റിങിനയക്കുകയായിരുന്നു. ക്യാപ്റ്റന്‍ അമ്പാട്ടി റായിഡു പുറത്താകാതെ നേടിയ (31പന്തില്‍ 52 റണ്‍സ്) അര്‍ധ സെഞ്ച്വറിയുടെ മികവിലാണ് ഹൈദരാബാദ് പൊരുതാവുന്ന സ്‌കോറിലെത്തിയത്. അക്ഷത് റെഡ്ഡി (34), സന്ദീപ് (25), ആശിഷ് റെഡ്ഡി (21) എന്നിവരും ഭേദപ്പെട്ട പ്രടകടനം പുറത്തെടുത്തു. കേരളത്തിനായി ജലജ് സക്‌സേന രണ്ടും സന്ദീപ് വാര്യര്‍, ബേസില്‍ തമ്പി, പി പ്രശാന്ത് എന്നിവര്‍ ഓരോ വിക്കറ്റും വീഴ്ത്തി. ഇന്ന് നടക്കുന്ന രണ്ടാം മത്സരത്തില്‍ കേരളം തമിഴ്‌നാടുമായി ഏറ്റുമുട്ടും.