കാക്കനാട്: മൂന്ന് മാസം കൊണ്ട് തൃക്കാക്കരയെ സമ്പൂര്‍ണ യാചക നിരോധന മേഖലയാക്കി മാറ്റാന്‍ ലക്ഷ്യമിട്ട് അധികൃതര്‍ നടത്തിയ പരിശോധയില്‍ പിടിയിലായവരില്‍ നാട്ടുകാരും. ഇന്നലെ രാവിലെ മുതല്‍ ഉച്ചവരെ നടത്തിയ പരിശോധനയില്‍ വിവിധ സ്ഥലങ്ങളിലെ ആരാധനാലയങ്ങളുടെ മുന്നില്‍ നിന്ന് മാത്രം 18 യാചകരാണ് പിടിയിലായത്. നാട്ടിലെ യാചകര്‍ക്ക് ഇനി ഭിക്ഷക്ക് ഇറങ്ങരുതെന്ന് താക്കീത് ചെയ്ത് വിട്ടയച്ചു. പിടിയിലായ മൂന്ന് ഇതരസംസ്ഥാനക്കാരെ സാമൂഹികക്ഷേമ വകുപ്പിന് കീഴില്‍ പ്രവര്‍ത്തിക്കുന്ന കാക്കനാട്ടിലെ തെരുവോരത്തിലേക്ക് മാറ്റി.
യാചകരുടെ കൂട്ടത്തില്‍ തൃക്കാക്കര നിവാസികളായ നാലു പേരെയും പിടികൂടി താക്കീത് ചെയ്ത് വിട്ടയച്ചു.
കൂടുതല്‍ ആളുകള്‍ കേന്ദ്രീകരിക്കുന്ന കാക്കനാട് ജങ്ഷന്‍, പടമുകള്‍ ഇന്ദിര ജങ്ഷന്‍, കരുമക്കാട് എന്നിവടങ്ങളില്‍ നിന്നാണ് ഇതര സംസ്ഥാനക്കാരായ യാചകരെ പിടികൂടിയത്. കുഴിക്കാട്ട്മൂല, കരുമക്കാട്, പടമുകള്‍, ഓലിമുകള്‍, ചിറ്റേത്തുകര പ്രദേശങ്ങളിലെ ആരാധനാലയങ്ങള്‍ കേന്ദ്രീകരിച്ചായിരുന്നു നാട്ടിലെ യാചകരെ പിടികൂടിയത്. കൊച്ചിയുടെ ഉപനഗരമായി മാറിയ തൃക്കാക്കരയില്‍ ജനത്തിരക്കേറിയതോടെ ഇതര സംസ്ഥാനങ്ങളിലെ ഭിക്ഷാടന മാഫിയ കുട്ടികള്‍ ഉള്‍പ്പെടെയുള്ളവരെ രംഗത്തിറക്കി പണം കൊയ്യുന്നുണ്ടെന്നാണ് നഗരസഭയുടെ കണ്ടെത്തെല്‍.
റസിഡന്റ്‌സ് അസോസിയേഷനുകള്‍ ഉള്‍പ്പെടെയുള്ള സന്നദ്ധ സംഘടനകളുടെയും സഹകരണത്തോടെയാണ് നഗരസഭ പ്രദേശത്ത് പരിശോധന നടത്തിയത്. നഗരസഭ ചെയര്‍പേഴ്‌സണ്‍ കെ.കെ.നീനു, വൈസ് ചെയര്‍മാന്‍ സാബുഫ്രാന്‍സിസ്, കൗണ്‍സിലര്‍മാരായ പി.എം.യൂസഫ്, ഉഷ പ്രവീണ്‍, റുഖിയ എന്നിവരുടെ നേതൃത്വത്തിലായിരുന്നു പരിശോധന. യാചകരെ വാര്‍ഡുകളില്‍ കണ്ടെത്തിയാല്‍ പൊതുജനങ്ങള്‍ക്ക് വിവരം കൗണ്‍സിലറെയോ നഗരസഭ ആരോഗ്യവിഭാഗം ഉദ്യോഗസ്ഥനെയോ വിവരം അറിയിക്കാം. ഫോണ്‍ : 974516668.