മുഹമ്മ: കേരള സര്‍ക്കാരിന്റെ നവകേരള മിഷന്‍ പദ്ധതിയുടെ ഭാഗമായി പൊതുവിദ്യാഭ്യാസ സംരക്ഷണ യജ്ഞം ഫലപ്രദമായി വിജയിപ്പിക്കാന്‍ തണ്ണീര്‍മുക്കം ഗവ:ഹയര്‍സെക്കന്‍ഡറി സ്‌കൂള്‍ ബഹുജന പങ്കാളിത്തത്തോടെ ഹൈടെക് ആക്കുന്നതിനുള്ള പ്രവര്‍ത്തനത്തിനു തുടക്കമായി.
12 ക്ലാസ് മുറികളാണ് ഹൈടെക് ആക്കുന്നത്. 5ന് പഞ്ചായത്തിലെ മുഴുവന്‍ വാര്‍ഡുകളിലും ജനപ്രതിനിധികള്‍, രക്ഷകര്‍ത്താക്കള്‍, പി ടി എ, പൂര്‍വ്വവിദ്യാര്‍ഥികള്‍, കുടുംബശ്രീ അയല്‍ക്കൂട്ടങ്ങള്‍ എന്നിവരുടെ നേതൃത്വത്തില്‍ വികസന ഫണ്ട് സമാഹരിക്കുമെന്ന് ബ്ലോക്ക് പഞ്ചായത്ത് പ്രസിഡന്റ് സിനിമോള്‍ സോമന്‍ വാര്‍ത്താസമ്മേളനത്തില്‍ പറഞ്ഞു. 12ന് രാവിലെ പൂര്‍വ്വവിദ്യാര്‍ഥി സംഗമം എ.എം ആരിഫ് എം.എല്‍.എ ഉദ്ഘാടനം ചെയ്യും. സിനിമോള്‍ സോമന്‍ അധ്യക്ഷതവഹിക്കും.
ഗാനരചയിതാവ് രാജീവ് ആലുങ്കല്‍ മുഖ്യപ്രഭാഷണം നടത്തും. മുതിര്‍ന്ന പൂര്‍വ്വവിദ്യാര്‍ഥികളെ ജില്ലാപഞ്ചായത്തംഗം സിന്ധു വിനു അദരിക്കും. ചേര്‍ത്തല ഡിവൈ.എസ്.പി.വൈ ആര്‍ റെസ്റ്റം പ്രൊട്ടക്ഷന്‍ ഗ്രൂപ്പ് വിശദീകരിക്കും.
വൈകിട്ട് 4ന് സാംസ്‌ക്കാരിക സമ്മേളനം മന്ത്രി പി തിലോത്തമന്‍ ഉദ്ഘാടനം ചെയ്യും. ജില്ലാപഞ്ചായത്ത് പ്രസിഡന്റ് ജി വേണുഗോപാല്‍ അധ്യക്ഷതവഹിക്കും.
കെ.സി വേണുഗോപാല്‍ എം.പി പ്രതിഭകളെ ആദരിക്കും. സാനുസുധീന്ദ്രന്‍, ജോബിന്‍ ജോസഫ്, സിന്ധു വിനു, സി വി വിനു, ആര്‍ അനിലാല്‍, കെ പി വേണുക്കുട്ടന്‍ എന്നിവരും വാര്‍ത്താസമ്മേളനത്തില്‍ പങ്കെടുത്തു.