വടക്കാഞ്ചേരി: വീടിന്റെ അടുക്കളയില്‍ വെച്ച് പാചക വാതക സിലിണ്ടര്‍ മാറ്റുന്നതിനിടെ സുരക്ഷാ വാല്‍വില്ലാത്ത സിലിണ്ടര്‍ ചോര്‍ന്ന് പാചക വാതകം പുറത്തേയ്ക്ക് തള്ളിയത് വന്‍ പരിഭ്രാന്തി പരത്തി.തെക്കും കര പഞ്ചായത്തിലെ നായരങ്ങാടിയില്‍ ഇന്നലെ കാലത്ത് 10 മണിയോടെ യാണ് സംഭവം. നാരകത്താനിയില്‍ സന്തോഷ് ബാബുവിന്റെ വീട്ടിലാണ് അപകടം നടന്നത്.
ഭാര്യ ആശയും, വിദ്യാര്‍ഥിനിയായ മകളും മാത്രമാണ് വീട്ടില്‍ ഉണ്ടായിരുന്നത്. ഇരുവരും പുറത്തേയ്ക്ക് ഇറങ്ങിയോടിയതിനാലാണ് വന്‍ ദുരന്തം ഒഴിവായത്. വിവരമറിഞ്ഞ് ഓടിക്കൂടിയെത്തിയ നാട്ടുകാര്‍ സിലിണ്ടര്‍ വീടിന് പുറത്തേയ്ക്ക് അതിവേഗം മാറ്റി.
നേരത്തെ മംഗലത്തും സമാന മായ സംഭവം നടന്നിരുന്നു. ഉപഭോക്താക്കളുടെ ജീവനും, സ്വത്തിനും ഒരു സുരക്ഷിതത്വവും നല്‍കാത്ത ഇന്ത്യന്‍ ഓയില്‍ കോര്‍പ്പറേഷനെതിരെ പ്രതിഷേധം ശക്തമായിട്ടുണ്ട്.