ചണ്ഡീഗഢ്: സ്‌കീയിങ് പോരാട്ടത്തില്‍ ഇന്ത്യക്കായി കന്നി മെഡല്‍ നേടി മണാലി സ്വദേശിനി ആഞ്ചല്‍ താക്കൂര്‍ ചരിത്രമെഴുതി.
സ്‌കീയിങില്‍ ഇന്ത്യക്ക് ലഭിക്കുന്ന ആദ്യ മെഡലാണിത്. തുര്‍ക്കിയില്‍ നടന്ന ആല്‍ഫിന്‍ എഡര്‍ 3200 കപ്പ് അന്താരാഷ്ട്ര സ്‌കീയിങിലാണ് രാജ്യത്തിന് അഭിമാന നേട്ടം സമ്മാനിച്ച് 21കാരിയായ ആഞ്ചല്‍ വെങ്കല മെഡല്‍ സ്വന്തമാക്കിയത്. സ്ലാലോം റെയ്‌സിലാണ് താരത്തിന്റെ നേട്ടം. വിന്റര്‍ ഗെയിംസ് ഫെഡറേഷന്‍ ഏഫ് ഇന്ത്യയുടെ സെക്രട്ടറി ജനറലായ റോഷന്‍ താക്കൂറിന്റെ മകളാണ് ആഞ്ചല്‍. ഈ വര്‍ഷം അരങ്ങേറുന്ന വിന്റര്‍ ഒളിംപിക്‌സില്‍ താരം രാജ്യത്തിനായി മത്സരിക്കാനിറങ്ങും.