കൂത്തുപറമ്പ്: ചിറ്റാരിപ്പറമ്പിനടുത്ത് വട്ടോളിയില്‍ എസ്.ഡി.പി.ഐ പ്രവര്‍ത്തകനും സ്‌കൂള്‍ ബസ് ഡ്രൈവറുമായ കണ്ണവം കിഴക്കാലിലെ പുതിയപുരയില്‍ അയൂബി(22)ന് വെട്ടേറ്റ സംഭവത്തില്‍ കണ്ണവം പൊലിസ് ആര്‍.എസ്.എസ് പ്രവര്‍ത്തകര്‍ക്കെതിരേ കേസെടുത്തു. അമല്‍രാജ്, റിഷിന്‍ എന്നിവര്‍ക്കെതിരേയും കണ്ടാലറിയാവുന്ന മറ്റു അഞ്ചു ആര്‍.എസ്.എസ് പ്രവര്‍ത്തകര്‍ക്കെതിരേയുമാണ് വധശ്രമത്തിന് കേസെടുത്തത്. വ്യാഴാഴ്ച വൈകുന്നേരം വട്ടോളിയില്‍ സ്‌കൂള്‍ വിദ്യാര്‍ഥികളെ ഇറക്കി മാനന്തേരി ഭാഗത്തേക്ക് പുറപ്പെടുന്നതിനിടെയാണ് അക്രമിസംഘം അയൂബിനെ വെട്ടിപ്പരുക്കേല്‍പിച്ചത്. കൈക്കും കാലിനും വെട്ടേറ്റ് ഗുരുതരാവസ്ഥയിലായ അയ്യൂബ് കോഴിക്കോട്ടെ സ്വകാര്യ ആശുപത്രിയില്‍ ചികിത്സയിലാണ്. പ്രദേശത്ത് പൊലിസ് സ്ഥാപിച്ച സി.സി.ടി.വി. കാമറയില്‍ പ്രതികളുടെ ദൃശ്യങ്ങള്‍ പതിഞ്ഞിട്ടുണ്ട്. ഇതു കേന്ദ്രീകരിച്ചാണ് അന്വേഷണം.