അരീക്കോട്: മൈത്ര കുത്തുപറമ്പ് പറക്കാട്ട് റബര്‍ തോട്ടത്തിനു തീപിടിച്ചു. കഴിഞ്ഞ ദിവസം രാവിലെ 11നാണ് സംഭവം. കുത്തുപറമ്പ് സ്വദേശി അബ്ദുല്ല റബര്‍ തോട്ടത്തിനു സമീപത്തെ പറമ്പിലെ കാടുകള്‍ തീയിട്ടു നശിപ്പിക്കുന്നതിനിടെ വലിയ പീടിയേക്കല്‍ മുഹമ്മദ്, സഹോദരി ആയിശുമ്മ, സി.ടി മുഹമ്മദ് എന്നിവരുടെയും മൈത്ര പള്ളിയുടെയും യതീംഖാനയുടെയും അധീനതയിലുള്ള റബര്‍തോട്ടത്തിലേക്ക് തീ പടരുകയായിരുന്നു.
ആറേക്കര്‍ ഭൂമിയിലുള്ള ആയിരത്തോളം റബര്‍ മരങ്ങളും 30 തെങ്ങുകളുമാണ് കത്തിനശിച്ചത്. 15 ലക്ഷത്തോളം രൂപയുടെ നഷ്ടം കണക്കാക്കുന്നുണ്ട്. നാട്ടുകാര്‍ ചേര്‍ന്നാണ് തീയണച്ചത്. ഊര്‍ങ്ങാട്ടിരി ഗ്രാമപഞ്ചായത്ത് പ്രസിഡന്റ് എന്‍.കെ ഷൗക്കത്തലിയുടെ നേതൃത്വത്തിലുള്ള സംഘം സ്ഥലം സന്ദര്‍ശിച്ചു.