ശ്രീനഗര്‍: പാകിസ്താന്‍ നടത്തിയ വെടിവയ്പില്‍ ഇന്ത്യന്‍ ജവാന് വീരമൃത്യു. ജമ്മുകശ്മിരിലെ സുന്ദര്‍ബനിയിലുണ്ടായ വെടിവയ്പില്‍ മഹാരാഷ്ട്ര സ്വദേശിയായ ലാന്‍സ് നായിക് യോഗേഷ് മുരളീധരനാണ് കൊല്ലപ്പെട്ടത്. ഗുരുതരമായി പരുക്കേറ്റ ഇദ്ദേഹത്തെ ഉടന്‍ ആശുപത്രിയിലെത്തിച്ചെങ്കിലും രക്ഷിക്കാനായില്ല. ലാന്‍സ് നായിക് യോഗേഷ് മുരളീധരന്‍ ഇന്ത്യയുടെ ധീരനും സത്യസന്ധനുമായ സൈനികനായിരുന്നു. അദ്ദേഹം അര്‍പ്പിച്ച ത്യാഗത്തിനും ജോലിയോടുള്ള ആത്മാര്‍ഥയും രാജ്യം എപ്പോഴും ഓര്‍ക്കുമെന്ന് പ്രതിരോധ മന്ത്രാലയ വക്താവ് പറഞ്ഞു.
അതിനിടെ സൈന്യം നടത്തിയ വെടിവയ്പില്‍ രണ്ടു പേര്‍ക്ക് പരുക്കേറ്റു. വാഹനം നിര്‍ത്താന്‍ സൈന്യം ആവശ്യപ്പെട്ടെങ്കിലും നിര്‍ത്താതെപോയതിനെ തുടര്‍ന്ന് സൈന്യം വെടിയുതിര്‍ക്കുകയായിരുന്നു.
അന്താരാഷ്ട്ര അതിര്‍ത്തി കടന്ന് സാംബാ ജില്ലയില്‍ പാകിസ്താന്‍ കഴിഞ്ഞ ആഴ്ച നടത്തിയ വെടിവയ്പില്‍ ഒരു ബി.എസ്.എഫ് ജവാന്‍ കൊല്ലപ്പെട്ടിരുന്നു. സൈന്യത്തിന്റെ തിരിച്ചടിയില്‍ രണ്ടു തീവ്രവാദികളും കൊല്ലപ്പെട്ടിരുന്നു.