ദോഹ: ഖത്തറിലെ ഒരു ഊര്‍ജ കമ്പനി ജീവനക്കാരുടെ ശമ്പളം പകുതിയാക്കി കുറച്ചതായി റിപ്പോര്‍ട്ട്. പുതിയ തൊഴില്‍ കരാര്‍ ഒപ്പിടുന്നതിന് തൊഴിലാളികളുമായി ചര്‍ച്ച നടക്കുന്നതായും അല്‍ശര്‍ഖ് റിപ്പോര്‍ട്ട് ചെയ്തു.

ശമ്പളം 50 ശതമാനവും ഹൗസിങ് അലവന്‍സ് 30 ശതമാനവും കുറച്ചതായി കമ്പനിയിലെ ഒരു ജീവനക്കാരനെ ഉദ്ധരിച്ച് അല്‍ശര്‍ഖ് വ്യക്തമാക്കി. കമ്പനി പുതിയ മാനേജ്‌മെന്റ് ഏറ്റെടുത്തതിന് പിന്നാലെയാണ് തീരുമാനം. നേരത്തേ പിരിച്ചുവിട്ട ജീവനക്കാരെയെല്ലാം കമ്പനി തിരിച്ചെടുക്കും. ഇവര്‍ക്ക് പുതിയ ഉപാധികള്‍ പ്രകാരമുള്ള കരാര്‍ ഒപ്പിടുന്നതിന് രണ്ടാഴ്ചയാണ് അനുവദിച്ചിരിക്കുന്നത്.

പുതിയ തീരുമാനം നടപ്പിലായാല്‍ താന്‍ ജയിലില്‍ പോവേണ്ടി വരുമെന്ന് കമ്പനി നടപടി ബാധിക്കുന്ന ജീവനക്കാരില്‍ ഒരാളായ സ്വദേശി പറഞ്ഞു. ധാരാളം സാമ്പത്തിക ബാധ്യതകള്‍ ഉള്ള തനിക്ക് പുതിയ ശമ്പളം കൊണ്ട് അത് കൊടുത്തു വീട്ടാനാവില്ലെന്ന്്അദ്ദേഹം വ്യക്തമാക്കി. പ്രശ്‌നം പരിഹരിക്കാന്‍ അധികൃതര്‍ ഇടപെടണമെന്നും അദ്ദേഹം ആവശ്യപ്പെട്ടു.