ദോഹ: ഏകീകൃത മൂല്യവര്‍ധിത നികുതി(വാറ്റ്) 2018 മുതല്‍ നടപ്പാക്കാനാവുമെന്നാണു പ്രതീക്ഷിക്കുന്നതെന്ന് ഖത്തര്‍ ധനമന്ത്രി അലി ശരീഫ് അല്‍ഇമാദി. ജി.സി.സിയിലെ ആറ് രാജ്യങ്ങളും ഇതു സംബന്ധമായ കരാറില്‍ ഒപ്പുവച്ചിട്ടുണ്ടെന്ന് അദ്ദേഹം മാധ്യമപ്രവര്‍ത്തകരോട് പറഞ്ഞു. ബഹ്‌റൈന്‍, കുവൈത്ത്, ഒമാന്‍, ഖത്തര്‍, സഊദി അറേബ്യ, യു.എ.ഇ എന്നീ രാജ്യങ്ങളാണ് കരാറില്‍ ഒപ്പിട്ടത്.

ഗള്‍ഫ് രാജ്യങ്ങള്‍ പുതിയ വരുമാന മാര്‍ഗങ്ങള്‍ തേടുന്നതിന്റെ ഭാഗമായാണ് വാറ്റ് നടപ്പാക്കുന്നത്. രാജ്യങ്ങള്‍ക്ക് മുന്നൊരുക്കത്തിന് കൂടുതല്‍ സമയം വേണമെങ്കില്‍ 2018 ജനുവരി 1 മുതല്‍ എന്നത് ഒരു വര്‍ഷം കൂടി നീണ്ടേക്കാമെന്നും അല്‍ഇമാദി സൂചിപ്പിച്ചു. എന്നാല്‍, എത്ര ശതമാനമാണ് വാറ്റ് ഈടാക്കുക തുടങ്ങിയ വിശദാംശങ്ങള്‍ അദ്ദേഹം വ്യക്തമാക്കിയില്ല. അതേ സമയം, പ്രാഥമിക ചര്‍ച്ചയില്‍ ചില ചരക്കുകള്‍ക്ക് അഞ്ച് ശതമാനം നികുതി ഈടാക്കാന്‍ ധാരണയായതായി റിപോര്‍ട്ടുണ്ടായിരുന്നു.