ബയേണ്‍: ജര്‍മന്‍ ഫുട്‌ബോള്‍ ക്ലബ്ബായ ബയേണ്‍ മ്യൂണിക്കിന്റെ ക്യാപ്റ്റനായ ഫിലിപ്പ് ലാം വിരമിക്കുന്നു. ഈ സീസണിനൊടുവിലാണ് താരം വിരമിക്കുന്നത്. 2014ലെ ലോകകപ്പ് ജേതാക്കളായ ജര്‍മന്‍ ടീമിന്റെ ക്യാപ്റ്റനായിരുന്നു 33 കാരനായ ഫിലിപ്പ് ലാം.

2002ല്‍ ബയേണ്‍മ്യൂണിക്കിന്റെ സീനിയര്‍ ടീമില്‍ അരങ്ങേറ്റം കുറിച്ച താരം 501 മത്സരങ്ങളില്‍ ടീമിനെ പ്രതിനിധീകരിച്ചു. ഏഴ് ബുന്ദസ് ലിഗ കപ്പും ആറു ജര്‍മന്‍ കപ്പും ഒരു ചാംപ്യന്‍സ് ലീഗ് കപ്പും നേടുന്നതില്‍ പങ്കുവഹിച്ചു.

എന്റെ രീതിയില്‍ ഞാന്‍ ടീമിനെ നയിക്കും, എന്നില്‍ നിന്ന് ഏറ്റവും മികച്ചത് നല്‍കും ഈ സീസണ്‍ അവസാനം വരെ എന്ന് താരം പറഞ്ഞു. 2014ല്‍ ജര്‍മനി ലോകകപ്പ് നേടുന്നത് ഇദ്ദേഹത്തിന്റെ ക്യാപ്റ്റന്‍ പദവിക്ക് കീഴിലാണ്. ലോകകപ്പ് നേട്ടത്തോടെ രാജ്യാന്തര കരിയറിനോട് താരം വിടപറഞ്ഞിരുന്നു.