പേരാമ്പ്ര: എരവട്ടൂര്‍ ടൗണില്‍ ഡി.വൈ.എഫ്.ഐ സ്ഥാപിച്ച ബസ് കാത്തിരിപ്പുകേന്ദ്രം കഴിഞ്ഞ ദിവസം രാത്രി അജ്ഞാതര്‍ തകര്‍ത്തു. കോണ്‍ക്രീറ്റ് ചെയ്ത ബസ് കാത്തിരിപ്പു കേന്ദ്രത്തിന്റെ തൂണുകള്‍ തകര്‍ത്ത നിലയിലാണ്. രാവിലെയാണ് സംഭവം നാട്ടുകാരുടെ ശ്രദ്ധയില്‍പെട്ടത്.
കഴിഞ്ഞ കുറച്ചുദിവസങ്ങളായി പേരാമ്പ്രയിലും പരിസര പ്രദേശങ്ങളിലും സി.പി.എം- ബി.ജെ.പി സംഘര്‍ഷം നിലനിന്നിരുന്നു. കല്ലോട് രണ്ടാഴ്ച മുന്‍പ് ബി.ജെ.പി നേതൃത്വത്തിലുള്ള സേവാഭാരതി സ്ഥാപിച്ച ബസ് കത്തിരിപ്പുകേന്ദ്രം സി.പി.എം പ്രവര്‍ത്തകരും ആര്‍.എസ്.എസുകാരും തമ്മിലുള്ള സംഘര്‍ഷത്തില്‍ തകര്‍ക്കപ്പെട്ടിരുന്നു.
ഇതിന്റെ പ്രതികാരമെന്ന നിലയിലാണ് എരവട്ടൂര്‍ ബസ് കാത്തിരിപ്പു കേന്ദ്രം തകര്‍ത്തതെന്ന് കരുതുന്നു. സംഭവത്തില്‍ പ്രതിഷേധിച്ച് സി.പി.എം എരവട്ടൂരില്‍ ഹര്‍ത്താല്‍ നടത്തി. വൈകീട്ട് എരവട്ടൂരില്‍ സി.പിഎം നേതൃത്വത്തില്‍ പ്രകടനവും പൊതുയോഗവും നടത്തി.