കല്ലൂര്‍: കടുവയുടെ ആക്രമണത്തില്‍ രണ്ട് മാസം പ്രായമുള്ള കാട്ടാനക്കുട്ടിക്ക് പരുക്കേറ്റു. കല്ലൂര്‍ 64ല്‍ ദേശീയ പാതയോരത്താണ് ആനക്കുട്ടിയെ പരുക്കേറ്റ നിലയില്‍ കണ്ടത്. തിങ്കളാഴ്ച രാത്രിയിലാണ് ആക്രമണമുണ്ടായത്.
ആനകള്‍ കാവല്‍ നില്‍ക്കുന്നതിനാല്‍ വനം വകുപ്പ് അധികൃതര്‍ക്ക് കാട്ടാനക്കുട്ടിയുടെ അടുത്തേക്ക് എത്താനോ ചികിത്സ നല്‍കാനോ കഴിയാത്ത സ്ഥിതിയാണ്. രണ്ട് ആനകളാണ് പരുക്കേറ്റ കുട്ടിക്ക് സമീപം നിലയുറപ്പിച്ചിരിക്കുന്നത്. കടുവയുടെ ആക്രമണത്തില്‍ ആനക്കുട്ടിയുടെ കാലിനാണ് സാരമായ പരുക്കേറ്റത്. ആളുകള്‍ ആനയുടെ അടുത്തേക്ക് പോകുന്നതു തടയുന്നതിനും പരുക്കേറ്റ ആനകുട്ടിയെ നിരീക്ഷിക്കുന്നതിനുമായി വനം വകുപ്പ് ഉദ്യോഗസ്ഥരും പ്രദേശത്ത് കാവല്‍ നില്‍ക്കുന്നുണ്ട്.