തിരുവനന്തപുരം: വിദ്യാര്‍ഥി സമരത്തെയും വിവാദങ്ങളെയും തുടര്‍ന്ന് ലോ അക്കാദമിയുടെ പദവി സംബന്ധിച്ച് വ്യക്തത വരുത്താന്‍ അഫിലിയേഷന്‍ കമ്മിറ്റിയെ കേരള സര്‍വകലാശാല സിന്‍ഡിക്കേറ്റ് യോഗം ചുമതലപ്പെടുത്തി.
ലോ അക്കാദമിയുടെ അഫിലിയേഷന്‍ പിന്‍വലിക്കണമെന്ന് യു.ഡി.എഫ് അംഗങ്ങള്‍ ആവശ്യപ്പെട്ടു. ഭരണസമിതിയിലെ മാറ്റം യഥാസമയം സര്‍വകലാശാലയെ അറിയിക്കാതിരുന്നത് ഗുരുതരമായ വീഴ്ചയാണെന്നും അംഗങ്ങള്‍ അഭിപ്രായപ്പെട്ടു. സര്‍വകലാശാലയില്‍ നിന്ന് പി.എച്ച്.ഡി ലഭിക്കുന്നവര്‍ക്ക് വാര്‍ഷിക കോണ്‍വക്കേഷന്‍ നടത്താനും സിന്‍ഡിക്കേറ്റ് തീരുമാനിച്ചു. സര്‍വകലാശാല രേഖകള്‍ ഡിജിറ്റലൈസ് ചെയ്യുന്നതു പഠിച്ചു റിപ്പോര്‍ട്ടു സമര്‍പ്പിക്കാന്‍ സ്റ്റാഫ് കമ്മിറ്റിയെ ചുമതലപ്പെടുത്തി. അധ്യാപകരുടെ നിയമനാംഗീകാരം സംബന്ധിച്ച കേസില്‍ സര്‍വകലാശാല കക്ഷി ചേരും. വിദ്യാഭ്യാസ വിഭാഗത്തില്‍ ഡോ. തെരേസ സൂസനും അക്വാട്ടിക് ബയോളജിയില്‍ ഡോ.എ. ബിജുകുമാറിനും പ്രഫസര്‍മാരായി സ്ഥാനക്കയറ്റം നല്‍കും. ഓയൂര്‍ ട്രാവന്‍കൂര്‍ എന്‍ജിനീയറിങ് കോളജിലെ അവസാന രണ്ടുവര്‍ഷ വിദ്യാര്‍ഥികളെ സംബന്ധിക്കുന്ന പ്രശ്‌നങ്ങള്‍ പരിഹരിക്കാന്‍ പരീക്ഷാ കണ്‍ട്രോളറെയും പരീക്ഷാ സമിതി കണ്‍വീനറെയും സിന്‍ഡിക്കേറ്റ് ചുമതലപ്പെടുത്തി.

അഫിലിയേഷന്‍ രേഖകള്‍
ലഭ്യമല്ലെന്ന് വിവരാവകാശ രേഖ

തിരുവനന്തപുരം: ലോ അക്കാദമിയുടെ അഫിലിയേഷന്‍ സംബന്ധിച്ച രേഖകള്‍ സര്‍വകലാശാലയില്‍ ലഭ്യമല്ലെന്ന് വിവരാവകാശ നിയമപ്രകാരമുള്ള ചോദ്യത്തിനു മറുപടി. സിന്‍ഡിക്കേറ്റംഗം ജോണ്‍സണ്‍ എബ്രഹാമിന്റെ ചോദ്യത്തിനാണു കേരള സര്‍വകലാശാല മറുപടി നല്‍കിയത്.
കോളജിന്റെ സ്റ്റാറ്റസിനെപ്പറ്റിയുള്ള ചോദ്യത്തിന് സ്വകാര്യ കോളജാണെന്നാണ് സര്‍വകലാശാലയുടെ മറുപടി. 1972 ലെ ഡയറക്ട് പേയ്‌മെന്റ് കരാറില്‍ സ്വകാര്യ കോളജുകള്‍ ഒപ്പിട്ടതോടുകൂടി എല്ലാ സ്വകാര്യ കോളജുകളും സ്വകാര്യ എയ്ഡഡ് കോളജുകളായി മാറി.
എന്നാല്‍ ലോ അക്കാദമി മാത്രം ഡയറക്ട് പേയ്‌മെന്റ് കരാറില്‍ ഒപ്പിട്ടിരുന്നില്ല. സ്വകാര്യ കോളജെന്ന പേരിലാണ് ലോ അക്കാദമി ഇപ്പോഴും നിലനില്‍ക്കുന്നത്.