സിംഗപ്പൂര്‍ സിറ്റി: സമസ്ത കേന്ദ്ര മുശാവറാംഗവും ദാറുല്‍ഹുദാ ഇസ്‌ലാമിക സര്‍വകലാശാല വൈസ് ചാന്‍സലറുമായ ഡോ. ബഹാഉദ്ദീന്‍ മുഹമ്മദ് നദ്‌വി സിംഗപ്പൂര്‍ ഗ്രാന്‍ഡ് മുഫ്തി ഡോ. മുഹമ്മദ് ഫത്‌റീസ് ബാകറമുമായി കൂടിക്കാഴ്ച നടത്തി. സിംഗപ്പൂരിലെ ഇസ്‌ലാമിക ചലനങ്ങള്‍ക്കു നേതൃത്വം നല്‍കുന്ന ഇസ്‌ലാമിക് റിലീജ്യസ് കൗണ്‍സില്‍ ഓഫ് സിംഗപ്പൂരിന്റെ ആസ്ഥാന മന്ദിരത്തില്‍ ഗ്രാന്‍ഡ് മുഫ്തിയുടെ ഔദ്യോഗിക വസതിയില്‍ വച്ചായിരുന്നു കൂടിക്കാഴ്ച.
മതവിദ്യാഭ്യാസ രംഗത്ത് ഇരുരാജ്യങ്ങളിലും ആവിഷ്‌കരിക്കുന്ന സംവിധാനങ്ങളും പദ്ധതികളും പരിചയപ്പെടുത്തിയ ഇരുവരും പുതിയ കാലത്തെ പണ്ഡിതകൂട്ടായ്മകളുടെ പ്രവര്‍ത്തനരീതിയെ കുറിച്ചും ചര്‍ച്ച നടത്തി. സിംഗപ്പൂരിലെ മലബാര്‍ മസ്ജിദ് ചീഫ് ഇമാം ശഫീഖ് ഹുദവി കാരിമുക്ക്, ഹാജി മുഹമ്മദ് യൂസുഫ് മലേഷ്യ, ഹംസ ഹാജി സിംഗപ്പൂര്‍ എന്നിവര്‍ ഡോ. നദ്‌വിയെ അനുഗമിച്ചിരുന്നു.
സിംഗപ്പൂരിലെ മസ്ജിദ് ബാ അലവി സ്ഥാപകനും ആത്മീയ നേതാവുമായിരുന്ന അന്തരിച്ച ഹബീബ് മുഹമ്മദ് സാലിം അല്‍ അത്താസിന്റെ പേരിലുള്ള ആഗോള മൗലിദ് സദസില്‍ സംബന്ധിക്കാനും വിവിധ പണ്ഡിതരുമായി കൂടിക്കാഴ്ച നടത്താനുമാണ് നദ്‌വി സിംഗപ്പൂരിലെത്തിയത്.
റാഡിന്‍സ് മാസ് പ്രവിശ്യ ആസ്ഥാനമായി പ്രവര്‍ത്തിക്കുന്ന വിദ്യാഭ്യാസ സന്നദ്ധസംഘടന ബി.എ.പി.എയുടെ ആസ്ഥാനവും അദ്ദേഹം സന്ദര്‍ശിച്ചു. വിദ്യാഭ്യാസ സംവിധാനങ്ങളെ കുറിച്ചു പഠിക്കാന്‍ ബി.എ.പി.എ പ്രതിനിധികള്‍ കഴിഞ്ഞ മാസം കേരളത്തിലെത്തിയിരുന്നു.