ഷാര്‍ജ: കാഴ്ച പരിമിതരുടെ ലോകകപ്പ് ക്രിക്കറ്റ് കിരീടം ഇന്ത്യ നിലനിര്‍ത്തി. ഫൈനലില്‍ ചിരവൈരികളായ പാകിസ്താനെ രണ്ട് വിക്കറ്റിന് കീഴടക്കിയാണ് ഇന്ത്യയുടെ കിരീട നേട്ടം.
ആദ്യം ബാറ്റ് ചെയ്ത പാകിസ്താന്‍ 40 ഓവറില്‍ എട്ട് വിക്കറ്റ് നഷ്ടത്തില്‍ 307 റണ്‍സെന്ന കൂറ്റന്‍ സ്‌കോര്‍ പടുത്തുയര്‍ത്തി. ഇന്ത്യ 38.2 ഓവറില്‍ എട്ട് വിക്കറ്റ് നഷ്ടത്തില്‍ 309 റണ്‍സെടുത്താണ് വിജയം സ്വന്തമാക്കിയത്. ടോസ് നേടി ഇന്ത്യ പാകിസ്താനെ ബാറ്റിങിനയക്കുകയായിരുന്നു.
ഇന്ത്യക്കായി സുനില്‍ രമേഷ് 93 റണ്‍സെടുത്ത് വിജയത്തില്‍ നിര്‍ണായക പങ്ക് വഹിച്ചു. നായകന്‍ അജയ് തിവാരി 62 റണ്‍സെടുത്തു. ആദ്യം ബാറ്റ് ചെയ്ത പാകിസ്താന് വേണ്ടി ബദര്‍ മുനീര്‍ 57 റണ്‍സെടുത്തു. റിയാസത് ഖാന്‍, ക്യാപ്റ്റന്‍ നിസാര്‍ അലി എന്നിവര്‍ യഥാക്രമം 48, 47 സ്‌കോറുകളും അടിച്ചെടുത്തു.
ഇത് അഞ്ചാം തവണയാണ് ഇന്ത്യ ലോകകപ്പില്‍ മുത്തമിടുന്നത്. നിലവിലെ ബ്ലൈന്‍ഡ് ടി20യിലും ഇന്ത്യയാണ് ലോക ചാംപ്യന്‍മാര്‍.