ലണ്ടന്‍: ഇംഗ്ലീഷ് പ്രീമിയര്‍ ലീഗ് ടീം വാട്‌ഫോര്‍ഡ് പരിശീലക സ്ഥാനത്ത് നിന്ന് മാര്‍ക്കോ സില്‍വയെ പുറത്താക്കി. സീസണില്‍ ടീമിന്റെ മോശം പ്രകടനത്തെ തുടര്‍ന്നാണ് ക്ലബ് സില്‍വയെ പുറത്താക്കിയത്. കഴിഞ്ഞ 11 പ്രീമിയര്‍ ലീഗ് മത്സരങ്ങളില്‍ ടീം ഒരു മത്സരത്തില്‍ മാത്രമാണ് ജയിച്ചത്. ഇതേത്തുടര്‍ന്നാണ് കോച്ചിനെതിരേ നടപടിയെടുത്തത്.
സീസണിന്റെ തുടക്കത്തില്‍ മികച്ച പ്രകടനം നടത്തിയ ടീം പിന്നീട് താഴോട്ട് പോകുകയായിരുന്നു. ഈ സീസണില്‍ സ്ഥാനം തെറിക്കുന്ന പ്രീമിയര്‍ ലീഗിലെ എട്ടാമത്തെ പരിശീലകനാണ് സില്‍വ. ഹള്‍ സിറ്റിയെ പരിശീലിപ്പിച്ച ശേഷമാണ് കഴിഞ്ഞ വര്‍ഷം പോര്‍ച്ചുഗല്‍ കോച്ചായ സില്‍വ വാട്‌ഫോര്‍ഡിലേക്കെത്തുന്നത്. കഴിഞ്ഞ ദിവസം ലെയ്സ്റ്റര്‍ സിറ്റിയോട് 2-0ത്തിന് വാട്‌ഫോര്‍ഡ് പരാജയപ്പെട്ടിരുന്നു. ഇതിന് പിന്നാലെയാണ് കോച്ചിന് പുറത്തേക്കുള്ള വഴി തുറന്ന് കൊടുത്തത്.