പുതുച്ചേരി: പുതുച്ചേരി സര്‍ക്കാരിലെ എട്ട് കോണ്‍ഗ്രസ്- ഡി.എം.കെ എം.എല്‍.എമാരെ അയോഗ്യരാക്കണമെന്നാവശ്യപ്പെട്ട് തെരഞ്ഞെടുപ്പ് കമ്മിഷനെ സമീപിക്കുമെന്ന് ബി.ജെ.പി. ഡല്‍ഹിയില്‍ 20 എ.എ.പി എം.എല്‍.എമാരെ തെരഞ്ഞെടുപ്പ് കമ്മിഷന്‍ അയോഗ്യരാക്കിയതിന്റെ പശ്ചാത്തലത്തിലാണ് ബി.ജെ.പിയുടെ നീക്കം.

ആറ് കോണ്‍ഗ്രസ് എം.എല്‍.എമാര്‍ക്കും രണ്ട് ഡി.എം.കെ എം.എല്‍.എമാര്‍ക്കും എതിരെയാണ് ബി.ജെ.പി പരാതിയുമായി രംഗത്തെത്തിയിരിക്കുന്നത്. ഒരേസമയം പുതുച്ചേരി സര്‍ക്കാരിന്റെ സ്റ്റാറ്റിയൂട്ടറി ബോഡികളുടെ ചെയര്‍മാന്‍ സ്ഥാനവും ഇവര്‍ അലങ്കരിക്കുന്നുണ്ടെന്നു ചൂണ്ടിക്കാട്ടിയാണ് നടപടിക്ക് പോവുന്നത്.

ഒരു കോണ്‍ഗ്രസ് എം.എല്‍.എ, മുഖ്യമന്ത്രിയുടെ പാര്‍ലമെന്ററി സെക്രട്ടറി കൂടിയായി പ്രവര്‍ത്തിക്കുന്നുണ്ടെന്ന് ബി.ജെ.പി ആരോപിച്ചു. സര്‍ക്കാരിന്റെ പ്രതിസന്ധി മറികടക്കാന്‍ മുഖ്യമന്ത്രി നാരായണ സ്വാമി എം.എല്‍.എമാരെ ചെയര്‍മാന്‍മാരായി നിയമിച്ചിരിക്കുകയാണെന്നും ബി.ജെ.പി കുറ്റപ്പെടുത്തി.

നേരത്തെ, പുതുച്ചേരി സര്‍ക്കാരിനെ കേന്ദ്ര സര്‍ക്കാര്‍ പിരിച്ചുവിടണമെന്നാവശ്യപ്പെട്ട് എ.ഐ.എ.ഡി.എം.കെ ആവശ്യപ്പെട്ടിരുന്നു. 2016 ല്‍ അധികാരത്തിലേറിയതു മുതല്‍ ലഫ്. ഗവര്‍ണര്‍ കിരണ്‍ ബേദിയും സര്‍ക്കാരും തമ്മില്‍ നിരന്തരം തര്‍ക്കത്തിലാണെന്നു ചൂണ്ടിക്കാട്ടിയായിരുന്നു ഈ ആവശ്യം.