ജറൂസലം: ജോര്‍ദാന്‍ രാജാവ് പ്രതിഷേധമറിയിച്ചു
തെല്‍അവീവ്: 2019 അവസാനത്തോടെ അമേരിക്കന്‍ എംബസി തെല്‍അവീവില്‍നിന്ന് ജറൂസലമിലേക്കു മാറ്റുമെന്ന് യു.എസ് വൈസ് പ്രസിഡന്റ് മൈക് പെന്‍സ്. ഇന്നലെ ഇസ്‌റാഈല്‍ പാര്‍ലമെന്റായ നെസെറ്റില്‍ നടത്തിയ പ്രഭാഷണത്തിലാണ് പെന്‍സ് ഇക്കാര്യം അറിയിച്ചത്. പശ്ചിമേഷ്യന്‍ സന്ദര്‍ശനത്തിന്റെ ഭാഗമായാണ് പെന്‍സ് ഇസ്‌റാഈലിലെത്തിയത്. ട്രംപിന്റെ ജറൂസലം പ്രഖ്യാപനത്തിനു പിറകെ ഒരു പ്രമുഖ യു.എസ് നേതാവ് നടത്തുന്ന ആദ്യ പശ്ചിമേഷ്യന്‍ സന്ദര്‍ശനമാണിത്.
പെന്‍സിന്റെ പ്രസംഗം തടയാന്‍ അറബ് എം.പിമാര്‍ ശ്രമിച്ചു. വിവാദ ജറൂസലം പ്രഖ്യാപനത്തില്‍ പ്രതിഷേധിച്ചായിരുന്നു ജനപ്രതിനിധികളുടെ നീക്കം. 'ജറൂസലം ഫലസ്തീന്റെ തലസ്ഥാനമാണ് ' എന്ന് അറബിയിലും ഇംഗ്ലീഷിലും എഴുതിയ പ്ലക്കാര്‍ഡുകളുമായാണ് എം.പിമാര്‍ സഭയിലെത്തിയത്.
'ജറൂസലം ഇസ്‌റാഈല്‍ തലസ്ഥാനമാണ്. യു.എസ് എംബസി തെല്‍അവീവില്‍നിന്ന് ജറൂസലമിലേക്കു മാറ്റാനുള്ള പ്രാരംഭനടപടികള്‍ ആരംഭിക്കാന്‍ പ്രസിഡന്റ് ട്രംപ് സ്റ്റേറ്റ് ഡിപാര്‍ട്ട്‌മെന്റിനോട് ആവശ്യപ്പെട്ടിട്ടുണ്ട്. അടുത്ത ആഴ്ചകളില്‍ തന്നെ മുന്നോട്ടുള്ള പദ്ധതികളുടെ കാര്യത്തില്‍ അന്തിമരൂപമാകും. ഈ വര്‍ഷം അവസാനിക്കും മുന്‍പുതന്നെ എംബസി ജറൂസലമില്‍ തുറക്കും'-പെന്‍സ് പ്രഭാഷണത്തില്‍ വ്യക്തമാക്കി.
മേഖലയിലെ സമാധാന പ്രക്രിയയില്‍ മധ്യസ്ഥ റോള്‍ വഹിക്കാനാണ് അമേരിക്ക ഉദ്ദേശിക്കുന്നതെങ്കില്‍ അതു നീതിയുക്തവും അന്താരാഷ്ട്ര നിയമങ്ങളെ അംഗീകരിക്കുന്നതുമാകണമെന്ന് ഫലസ്തീന്‍ പ്രസിഡന്റ് മഹ്മൂദ് അബ്ബാസിന്റെ വക്താവ് പെന്‍സിന്റെ പ്രഭാഷണത്തോടു പ്രതികരിച്ചു.
അതിനിടെ, ജറൂസലം പ്രഖ്യാപനത്തില്‍ ജോര്‍ദാന്‍ രാജാവ് അബ്ദുല്ല രണ്ടാമന്‍ പെന്‍സിനോട് പ്രതിഷേധം നേരിട്ട് അറിയിച്ചു. ഈജിപ്തില്‍നിന്ന് ശനിയാഴ്ച മൈക്ക് പെന്‍സ് ജോര്‍ദാനിലെ അമ്മാനിലെത്തിയിരുന്നു. ഇവിടെനിന്നാണ് ഇസ്‌റാഈലിലേക്കു തിരിച്ചത്. 'ജറൂസലം ജൂതരെ പോലെ മുസ്‌ലിംകള്‍ക്കും ക്രിസ്ത്യാനികള്‍ക്കും ഒരുപോലെ പ്രധാനപ്പെട്ടതാണ്. മേഖലയില്‍ സമാധാനമുണ്ടാകേണ്ടത് അത്യാവശ്യമാണ്. അമേരിക്ക പുതുതായെടുത്ത തീരുമാനം പ്രതിഷേധാര്‍ഹമാണ് '-അബ്ദുല്ല രാജാവ് കൂടിക്കാഴ്ചയില്‍ പെന്‍സിനോട് വ്യക്തമാക്കി.
നേരത്തെ, കെയ്‌റോയില്‍ നടത്തിയ സന്ദര്‍ശനത്തില്‍ ഈജിപ്ത് പ്രസിഡന്റ് അബ്ദുല്‍ ഫത്താഹ് സീസിയും വിഷയത്തില്‍ പെന്‍സിനോട് പ്രതിഷേധം അറിയിച്ചിരുന്നു.