തിരുവനന്തപുരം: മന്ത്രിമാര്‍ 'വാഴാത്ത' മന്‍മോഹന്‍ ബംഗ്ലാവ് തെരഞ്ഞെടുത്തതിനു പിന്നാലെ പതിമൂന്നാം നമ്പര്‍ സ്‌റ്റേറ്റ് കാര്‍ ആവശ്യപ്പെട്ട് ധനകാര്യ മന്ത്രി ഡോ.തോമസ് ഐസക്. കാറിനായി തോമസ് ഐസക് ആവശ്യം ഉന്നയിച്ചെങ്കിലും രണ്ടുദിവസത്തിനുള്ളിലെ കാര്‍ അനുവദിക്കു. നിലവില്‍ 13 ാം നമ്പര്‍ കാര്‍ ഇല്ലാത്തതാണ് ഇതിനു കാരണം. കഴിഞ്ഞ യു.ഡി.എഫ് സര്‍ക്കാര്‍ 13 ാം നമ്പര്‍ കാര്‍ ഒഴിവാക്കിയതിനാല്‍ പുതിയ കാര്‍ വാങ്ങിയാല്‍ മാത്രമെ 13 ാം നമ്പര്‍ അനുവദിക്കാനും കഴിയു. മന്ത്രിമാര്‍ വാഴില്ലെന്ന് വിശ്വസിക്കുന്ന മന്‍മോഹന്‍ ബംഗ്ലാവാണ് തോമസ് ഐസക് ഔദ്യോഗിക വസതിയായി തെരഞ്ഞെടുത്തത്.

ബി.ജെ.പി നേതാവ് കെ.സുരേന്ദ്രനാണ് 13 ാം നമ്പര്‍ കാര്‍ മന്ത്രിമാര്‍ ഉപയോഗിക്കാത്തതിനെ വിമര്‍ശിച്ച് രംഗത്ത് വന്നത്. അശുഭനമ്പറായി ചിലര്‍ വിശ്വസിക്കുന്ന 13 നെ സി.പി. എം മന്ത്രിമാരും ഭയക്കുന്നതായി സുരേന്ദ്രന്‍ കഴിഞ്ഞ ദിവസം ആരോപിച്ചിരുന്നു. അതേസമയം 13ാം നമ്പറിനെചൊല്ലിയുളള വിവാദങ്ങള്‍ അനാവശ്യമാണെന്ന് കൃഷിമന്ത്രി വി.എസ്. സുനില്‍കുമാര്‍ പറഞ്ഞു. 13 ാം നമ്പര്‍ കാര്‍ വേണ്ടെന്ന് ഈ മന്ത്രിസഭയിലെ ആരും പറഞ്ഞിട്ടില്ല. തന്നോട്  ഈ കാര്‍ ഏറ്റെടുക്കാന്‍ പറഞ്ഞാല്‍ സന്തോഷത്തോടെ ഏറ്റെടുക്കുമെന്നും സുനില്‍കുമാര്‍ പറഞ്ഞു. കഴിഞ്ഞ ഇടത് സര്‍ക്കാരില്‍ വിദ്യാഭ്യാസ മന്ത്രിയായിരുന്ന എം. എ ബേബി 13 ാം നമ്പര്‍ കാര്‍ ഉപയോഗിച്ചിരുന്നു.