ദോഹ:സിവില്‍ വ്യോമയാന അതോറിറ്റിയുടെ ആഭിമുഖ്യത്തില്‍ പത്താമത് അല്‍ഖോര്‍ ആകാശ പ്രദര്‍ശനത്തിന്റെ ആദ്യദിനത്തില്‍ വ്യോമാഭ്യാസപ്രകടനം വീക്ഷിക്കാന്‍ നിരവധിപേരെത്തി. അല്‍ഖോര്‍ എയര്‍ഫീല്‍ഡില്‍ നടക്കുന്ന വിമാനങ്ങളുടെ ആകാശപ്രദര്‍ശനം ഇന്ന് സമാപിക്കും.
ഖത്തറില്‍ നിന്നും മറ്റ് ജിസിസി രാജ്യങ്ങളില്‍ നിന്നുമായി ഫ്‌ളൈയിങ് ക്ലബ്ബുകളുടെ അറുപത് ലൈറ്റ്, മീഡിയം വിമാനങ്ങളാണ് ഷോയില്‍ പങ്കെടുക്കുന്നത്. ലൈറ്റ്, മിഡ് സൈസ് ജെറ്റുകളുടെ അഭ്യാസപ്രകടനങ്ങള്‍ കാണികളെ ആകര്‍ഷിച്ചു.
ഗതാഗത കമ്യൂണിക്കേഷന്‍സ് മന്ത്രി ജാസിം ബിന്‍ സെയ്ഫ് അല്‍ സുലൈത്തി ഷോ ഉദ്ഘാടനം ചെയ്തു.
കുട്ടികളും കുടുംബങ്ങളും ഉള്‍പ്പെടെ നിരവധി പേര്‍ എയര്‍ഷോ കാണാനെത്തിയിരുന്നു. എയറോബാറ്റിക് പ്രകടനം, പാരാമോട്ടോര്‍ ഷോ, ജൈറോകോപ്ടര്‍, ചെറിയ വിമാനങ്ങളുടെ പ്രകടനം, ഡ്രോണ്‍(യുഎവി) ഷോ, ഫോര്‍മേഷന്‍ ഫ്‌ളൈയിങ് ഷോ, ഫ്രീ ഫ്‌ളൈയിങ് എന്നിവയ്ക്കു പുറമെ കുട്ടികള്‍ക്കുള്ള പരിപാടികള്‍, കുട്ടികള്‍ക്കും കുടുംബങ്ങള്‍ക്കുമായി വിനോദ പരിപാടികള്‍ എന്നിവയും ഒരുക്കിയിട്ടുണ്ട്.