കണ്ണൂര്‍: പാരമ്പര്യ ഇസ്‌ലാമിനു വിരുദ്ധമായി ഉയര്‍ന്നുവന്ന ഡോക്യുമെന്റ് ഇസ്‌ലാമാണു ലോകത്ത് ഇന്നു നിലനില്‍ക്കുന്ന മുസ്‌ലിം തീവ്രവാദത്തിനു കാരണമെന്നു എസ്.കെ.എസ്.എസ്.എഫ് സംസ്ഥാന സീനിയര്‍ വൈസ് പ്രസിഡന്റ് അഡ്വ. ഓണംപിള്ളി മുഹമ്മദ് ഫൈസി. മദീന പാഷന്‍ എന്ന പ്രമേയത്തില്‍ എസ്.കെ.എസ്.എസ്.എഫ് ജില്ലാസമ്മേളനത്തിന്റെ ഭാഗമായി 'സമസ്ത ആഗോള മുസ്‌ലിം ദര്‍പ്പണത്തില്‍' എന്ന വിഷയത്തില്‍ നടന്ന സെഷനില്‍ സംസാരിക്കുകയായിരുന്നു അദ്ദേഹം. ഡോക്യുമെന്റ് ഇസ്‌ലാം, ഗൂഗ്ള്‍ ഇസ്‌ലാം എന്നിവയുടെ പിറകെ പോകുന്നവര്‍ക്ക് ഒരിക്കലും ഇസ്‌ലാമിനെ ശരിയായ ദിശയില്‍ കാണാന്‍ കഴിയില്ല. അക്ഷരങ്ങള്‍ക്കപ്പുറത്തു ജീവിച്ചവരുടെ ജീവിതം പിന്തുടര്‍ന്നാലേ യാഥാര്‍ഥ ഇസ്‌ലാമിനെക്കുറിച്ച് പഠിക്കാനാകൂ. ഇവരുടെ കാലത്ത് ആരും ഭീകരവാദം പറഞ്ഞുനടന്നിട്ടില്ല. ആ കാലത്ത് പീസ് മൂവ്‌മെന്റും സ്‌നേഹം സംവാദവും ആരും ഉയര്‍ത്തിയിട്ടില്ല. പാരമ്പര്യ ഇസ്‌ലാമിനെ എന്നും ലോകം ആദരിച്ചിട്ടേയുള്ളൂ. പാരമ്പര്യ ഇസ്‌ലാമിന്റെ കൂടെയായതു കൊണ്ടാണു സമസ്തയ്ക്കു ഭയമില്ലാത്തത്. മുഹമ്മദ് ഇബ്‌നു അബ്ദുല്‍വഹാബിന്റെ ആശയം ഉള്‍ക്കൊണ്ടാണ് ഐ.എസും അല്‍ഖ്വായ്ദയും ആക്രമണം അഴിച്ചുവിടുന്നത്. ഇവര്‍ ലോകത്തെ ഭിന്നിപ്പിക്കാന്‍ ശ്രമിക്കുകയാണെന്നും മുഹമ്മദ് ഫൈസി വ്യക്തമാക്കി.
കേരളീയ മുസ്‌ലിംകള്‍ മുന്നില്‍ നിന്നതു മതേതരത്വം മുറുകെപ്പിടിച്ചതു കൊണ്ടാണെന്നു എസ്.വൈ.എസ് സംസ്ഥാന സെക്രട്ടറി മുസ്തഫ മുണ്ടുപാറ പറഞ്ഞു. 'സംഘടന ചരിത്രം, ഭാവി' എന്ന സെഷനില്‍ സംസാരിക്കുകയായിരുന്നു അദ്ദേഹം. രാജ്യത്ത് മുസ്‌ലിംകള്‍ പ്രതിസന്ധി നേരിട്ടപ്പോഴെല്ലാം കേരളീയ മുസ്‌ലിംകളുടെ ഇടപെടലാണു രക്ഷയായത്. ഇതിന്റെ ഉദാഹരണങ്ങളായിരുന്നു ബാബ്‌രി സംഭവവും ശരീഅത്ത് വിവാദവും. മഹല്ല് സംവിധാനവും വിജ്ഞാനവും ചേര്‍ത്തുപിടിച്ചതാണു കേരളത്തിലെ മുസ്‌ലിം പുരോഗതിക്കു കാരണമായതെന്നും മുസ്തഫ മുണ്ടുപാറ വ്യക്തമാക്കി.
സമ്മേളനം സംസ്ഥാനസെക്രട്ടറി സലാം ദാരിമി കിണവക്കല്‍ ഉദ്ഘാടനം ചെയ്തു. ഷഹീര്‍ പാപ്പിനിശ്ശേരി അധ്യക്ഷനായി. ബഷീര്‍ അസ്അദി നമ്പ്രം, മഹറൂഫ് മട്ടന്നൂര്‍, ജുനൈദ് ചാലാട്, നിയാസ് അസ്അദി സംസാരിച്ചു.
വിവിധ സെഷനുകള്‍ അബ്ദുറഹ്മാന്‍ കല്ലായി, അഹ്മദ് തേര്‍ളായി, അബ്ദുസമദ് മുട്ടം, ഇബ്രാഹിം ബാഖവി പൊന്ന്യം എന്നിവര്‍ ഉദ്ഘാടനം ചെയ്തു. എം.ടി അബൂബക്കര്‍ ദാരിമി, മുനീര്‍ ഹുദവി, ഷരീഫ് ബാഖവി എന്നിവര്‍ ക്ലാസുകള്‍ കൈകാര്യം ചെയ്തു. അസ്‌ലം അസ്ഹരി പൊയ്ത്തുംകടവ്, അബൂബക്കര്‍ യമാനി, അബ്ദുല്‍ഷുക്കൂര്‍ ഫൈസി, സലാം പൊയനാട്, ഇഖ്ബാല്‍ മുട്ടില്‍, റഷീദ് ഫൈസി, ഷൗക്കത്ത് ഉമ്മന്‍ചിറ, ഹാരിസ് അസ്അദി സംസാരിച്ചു. തലമുറ സംഗമത്തില്‍ റഹ്ത്തുല്ല ഖാസിമി മൂത്തടം പ്രഭാഷണം നടത്തി. സിദ്ദീഖ് ഫൈസി വെണ്‍മണല്‍ അധ്യക്ഷനായി. എസ്.വി മുഹമ്മദലി മുഖ്യാതിഥിയായി. ലത്തീഫ് പന്നിയൂര്‍ സംസാരിച്ചു. ഇശല്‍നൈറ്റ് മന്ത്രി കടന്നപ്പള്ളി രാമചന്ദ്രന്‍ ഉദ്ഘാടനം ചെയ്തു. എ.കെ അബ്ദുല്‍ബാഖി മുഖ്യപ്രഭാഷണം നടത്തി.
ഇന്നു വൈകുന്നേരം നാലിന് സെന്റ് മൈക്കിള്‍സ് സ്‌കൂള്‍ പരിസരത്തു നിന്നു പ്രകടനം ആരംഭിക്കും. 5.30ന് കലക്ടറേറ്റ് മൈതാനിയിലെ ഹുദൈബിയ നഗറില്‍ സമാപന സമ്മേളനം സയ്യിദ് ജമലുല്ലൈലി തങ്ങള്‍ ഉദ്ഘാടനം ചെയ്യും. പി.കെ.പി അബ്ദുസലാം മുസ്‌ലിയാര്‍ അധ്യക്ഷനാകും. മാണിയൂര്‍ അഹമ്മദ് മുസ്‌ലിയാര്‍ അനുഗ്രഹ പ്രഭാഷണം നടത്തും. നാസര്‍ ഫൈസി കൂടത്തായി, സത്താര്‍ പന്തല്ലൂര്‍, മമ്മൂട്ടി വയനാട് എന്നിവര്‍ പ്രഭാഷണം നടത്തും.