മലപ്പുറം: മഞ്ചേരി ഹുദൈബിയ്യ നഗരിയില്‍ നടക്കുന്ന എസ്.കെ.എസ്.എസ്.എഫ് മദീനപാഷന്‍ സമ്മേളന നഗരിയില്‍ ഉയര്‍ത്താനായി മക്കയിലെ ഹുദൈബിയ്യയില്‍നിന്നു കൊണ്ടുവരുന്ന പതാക ഇന്നു രാവിലെ ഏഴിനു കരിപ്പൂരിലെത്തിച്ചേരും. സി.എച്ച് ത്വയ്യിബ് ഫൈസിയുടെ നേതൃത്വത്തിലാണ് നഗരിയിലുയര്‍ത്താനുള്ള എസ്.കെ.എസ്.എസ്.എഫ് പതാക കൊണ്ടുവരുന്നത്.
കരിപ്പൂരില്‍നിന്നു ജില്ലാ പ്രസിഡന്റ് സയ്യിദ് ഫഖ്‌റുദ്ദീന്‍ ഹസനി തങ്ങളുടെ നേതൃത്വത്തില്‍ മുന്‍കാല സാരഥികളും ജില്ലാ ഭാരവാഹികളും ചേര്‍ന്ന് ഏറ്റുവാങ്ങും. തുടര്‍ന്നു വാഴക്കാട് കണ്ണിയത്ത് ഉസ്താദ് മഖാമില്‍ സിയാറത്തിനു ശേഷം മഞ്ചേരിയില്‍ സമ്മേളന നഗരിയില്‍ എത്തിക്കും.
കൊടിമര ജാഥ നാളെ വൈകിട്ട് നാലിനു പയ്യനാട് കെ.സി ജമാലുദ്ദീന്‍ മുസ്‌ലിയാരുടെ മഖാമില്‍ സിയാറത്ത് നടത്തി പുറപ്പെടും. പ്രഥമ ജില്ലാ പ്രസിഡന്റ് എം.പി മുഹമ്മദ് മുസ്‌ലിയാര്‍ കടുങ്ങല്ലൂര്‍ കൊടിമര ജാഥനയിക്കും. നാളെ വൈകിട്ട് നാലിനു മഞ്ചേരി ഹുദൈബിയ്യ നഗരിയില്‍ സമസ്ത വിദ്യാഭ്യാസ ബോര്‍ഡ് എക്‌സിക്യൂട്ടീവ് അംഗം എം.പി.എം ഹസന്‍ ശരീഫ് കുരിക്കള്‍ പതാക ഉയര്‍ത്തും.
പതാകയാത്രയെ സ്വീകരിക്കുന്ന പ്രവര്‍ത്തകരും വാഹനങ്ങളും ഇന്നു രാവിലെ ഏഴിനു കരിപ്പൂര്‍ മുസാഫര്‍ഖാന പരിസരത്തും കൊടിമര ജാഥയെ അനുഗമിക്കുന്നവര്‍ നാളെ വൈകിട്ട് നാലിനു പയ്യനാട് കെ.സി ഉസ്താദ് മഖാമിലും എത്തിച്ചേരണമെന്നു ജില്ലാ കമ്മിറ്റി അഭ്യര്‍ഥിച്ചു.