ലഖ്‌നൗ: റിപ്പബ്ലിക് ദിനാഘോഷത്തിന്റെ ഭാഗമായി നടത്തിയ റാലിയെച്ചൊല്ലി ഉത്തര്‍പ്രദേശില്‍ രണ്ട് സമുദായങ്ങള്‍ തമ്മില്‍ സംഘര്‍ഷം. കസ്ഗഞ്ച് ജില്ലയില്‍ വെള്ളിയാഴ്ചയാണ് സമുദായ സംഘര്‍ഷമുണ്ടായത്. അനുവാദമില്ലാതെ നടന്ന റാലിയെ ചൊല്ലിയാണ് കലാപം പൊട്ടിപ്പുറപ്പെട്ടത്.
കലാപത്തിനിടയില്‍ നെഞ്ചില്‍ വെടിയേറ്റ് ചന്ദന്‍ഗുപ്ത(22) എന്നയാള്‍ കൊല്ലപ്പെടുകയും മറ്റൊരാളെ പരുക്കുകളോടെ ആശുപത്രിയില്‍ പ്രവേശിപ്പിക്കുകയും ചെയ്തിട്ടുണ്ട്. ചന്ദന്‍ ഗുപ്തയുടെ സംസ്‌കാരചടങ്ങ് കഴിഞ്ഞ വരുന്നവരാണ് ഇന്നലെ വീണ്ടും കലാപമുണ്ടാക്കിയതെന്ന് പൊലിസ് അറിയിച്ചു.
സംഭവവുമായി ബന്ധപ്പെട്ട് 49 പേരെ പൊലിസ് അറസ്റ്റ് ചെയ്തിട്ടുണ്ട്. ഇന്നലെ കലാപകാരികള്‍ നിരവധി കച്ചവട സ്ഥാപനങ്ങളും വാഹനങ്ങളും അഗ്നിക്കിരയാക്കി. കലാപം നിയന്ത്രിക്കുന്നതിനായി ജില്ലയില്‍ നിരോധനാജ്ഞ പ്രഖ്യാപിച്ചിട്ടുണ്ട്. ജില്ലയുടെ അതിര്‍ത്തികളെല്ലാം അടച്ചതായി ജില്ലാ കലക്ടര്‍ ആര്‍.പി സിങ് അറിയിച്ചു.
നിരവധി വസ്തുവകകള്‍ നശിപ്പിക്കപ്പെട്ടതായും സ്ഥിതി ഗതികള്‍ നിയന്ത്ര വിധേയമാണെന്നും പൊലിസ് പറഞ്ഞു. സംഭവത്തെക്കുറിച്ച് അന്വേഷിക്കാന്‍ പ്രത്യേക പൊലിസ് സംഘത്തെ നിയോഗിച്ചിട്ടുണ്ട്.
വെള്ളിയാഴ്ച നടന്ന റാലിക്കിടയില്‍ ഇരുവിഭാഗവും തമ്മില്‍ കല്ലേറില്‍ തുടങ്ങിയ സംഘര്‍ഷം പിന്നീട് വെടിവയ്പ്പില്‍ കലാശിക്കുകയായിരുന്നു.
സംഘര്‍ഷത്തില്‍ ശക്തമായി പ്രതിഷേധിച്ച മുന്‍മുഖ്യമന്ത്രി അഖിലേഷ് യാദവ്, കുറ്റക്കാര്‍ക്കെതിരേ ശക്തമായ നടപടി സ്വീകരിക്കണമെന്ന് സര്‍ക്കാരിനോട് ആവശ്യപ്പെട്ടു.
റിപ്പബ്ലിക് ദിനത്തിലുണ്ടായ അനിഷ്ട സംഭവങ്ങള്‍ ഒരിക്കല്‍പോലും ആവര്‍ത്തിക്കാന്‍ പാടില്ലാത്തതാണ്. എന്നാല്‍ ഇരു സമുദായങ്ങള്‍ക്കും നീതി ഉറപ്പാക്കുന്ന വിധത്തില്‍ സര്‍ക്കാര്‍ പ്രവര്‍ത്തിക്കണമെന്ന് അദ്ദേഹം ആവശ്യപ്പെട്ടു.