കൊച്ചി: കെട്ടിടത്തില്‍ നിന്നും താഴെ വീണ് ജീവന് വേണ്ടി പിടഞ്ഞയാളെ രക്ഷപ്പെടുത്താതെ ആള്‍ക്കൂട്ടം കാഴ്ച്ചക്കാരായി നിന്നു. കൊച്ചിയിലെ പദ്മ ജംഗ്ഷനില്‍ കഴിഞ്ഞ ദിവസം സന്ധ്യയോടെയാണ് സംഭവം. അപകടത്തിന്റെ സി.സി.ടി.വി ദൃശ്യങ്ങള്‍ പുറത്തുവന്നു.

സമീപത്തെ ലോഡ്ജില്‍ നിന്നും തൃശ്ലൂര്‍ ഡിവൈന്‍ നഗര്‍ സ്വദേശി സജിയാണ് താഴേക്ക് വീണത്. തലകറങ്ങി കെട്ടിടത്തിന്റെ മൂന്നാം നിലയില്‍ നിന്നും താഴേ ഫുട്പാത്തിലേക്ക് വീഴുകയായിരുന്നു. സജി വീഴുമ്പോള്‍ സമീപത്ത് ധാരാളം പേരുണ്ടായിരുന്നുവെങ്കിലും ആരും അദ്ദേഹത്തെ തിരിഞ്ഞുനോക്കിയില്ല. ചിലര്‍ എത്തി നോക്കി വേഗം സ്ഥലം കാലിയാക്കി.

ആരും ശ്രദ്ധിക്കാതിരിക്കാത്തത് കണ്ട് വഴിയാത്രക്കാരിയായ സ്ത്രീ ഇടപെടുകയായിരുന്നു. പരുക്കേറ്റയാളെ ആശുപത്രിയിലെത്തിക്കാന്‍ അവര്‍ പലരോടായി ആവശ്യപ്പെട്ടു. ശേഷം ഒരു ഓട്ടോറിക്ഷ തടഞ്ഞുനിര്‍ത്തി പരുക്കേറ്റയാളെ കയറ്റിയെങ്കിലും പിന്നീട് അയാളെ വീണ്ടും തറയിലേക്ക് തന്നെ കിടത്തി. കുറച്ചു സമയത്തിനു ശേഷം സ്ത്രീ ഒരു കാര്‍ തടഞ്ഞുനിര്‍ത്തി ഇയാളെ ആശുപത്രിയിലെത്തിക്കുകയായിരുന്നു.

പരുക്കേറ്റ സജിയെ ആദ്യം ജനറല്‍ ആശുപത്രിയിലെ പ്രാഥമിക ചികിത്സയ്ക്കു ശേഷം കോട്ടയം മെഡിക്കല്‍ കോളജിലേക്ക് മാറ്റി. ഇയാളുടെ ജീവന്‍ രക്ഷിച്ച സ്ത്രീയെ തിരിച്ചറിഞ്ഞിട്ടില്ല.