ന്യൂഡല്‍ഹി: മുന്‍ ഡി.ജി.പി ടി.പി സെന്‍കുമാറിനെതിരേ വിജിലന്‍സ് അന്വേഷണം ആവശ്യപ്പെട്ട് നല്‍കിയ ഹരജി സുപ്രിംകോടതി തള്ളി. അവധിയിലായിരിക്കെ വ്യാജ മെഡിക്കല്‍ ബില്‍ ഹാജരാക്കി യാത്രാബത്ത വാങ്ങിയെന്നായിരുന്നു പരാതിക്കാരന്റെ ആരോപണം.
കേസില്‍ വിജിലന്‍സ് അന്വേഷണം വേണ്ടെന്ന ഹൈക്കോടതി ഉത്തരവ് ശരിവച്ച സുപ്രിംകോടതി, പരാതിക്കാരനായ സി.പി.എം നേതാവ് എ.ജെ സുകാര്‍ണയോട് 25,000 രൂപ പിഴയടയ്ക്കാനും നിര്‍ദേശിച്ചു. വ്യാജ പരാതികള്‍ അംഗീകരിക്കാനാകില്ലെന്ന് കോടതി നിരീക്ഷിച്ചു.
ഇത്തരം വിഷയങ്ങള്‍ക്കായി കോടതിയുടെ സമയം നഷ്ടപ്പെടുത്താനാകില്ലെന്നു ചൂണ്ടിക്കാട്ടിയാണ് ജസ്റ്റിസ് ജെ. ചെലമേശ്വര്‍ അധ്യക്ഷനായ സുപ്രിംകോടതി ബെഞ്ച് പരാതിക്കാരന് പിഴ വിധിച്ചത്.