കൊച്ചി: യൂനിയന്‍ ബാങ്ക് തൊടുപുഴ ശാഖാ മാനേജരായിരുന്ന പേഴ്‌സി ജോസഫ് ഡെസ്മണ്ടിനെ മര്‍ദിച്ച കേസില്‍ കുറ്റക്കാരായ പൊലിസ് ഉദ്യോഗസ്ഥര്‍ക്കെതിരേ എന്ത് നടപടിയെടുത്തുവെന്ന് 15 ദിവസത്തിനകം ഡി.ജി.പി അറിയിക്കണമെന്ന് ഹൈക്കോടതി.
കുറ്റക്കാരായ ഉദ്യോഗസ്ഥര്‍ക്ക് സ്ഥാനക്കയറ്റംനല്‍കിയോയെന്ന് വ്യക്തമാക്കണമെന്നും സിംഗിള്‍ ബെഞ്ചിന്റെ ഉത്തരവിലുണ്ട്. ഇടുക്കി എ.എസ്.പിയായിരുന്ന നിശാന്തിനി ഉള്‍പ്പെടെ അഞ്ച് പൊലിസ് ഉദ്യോഗസ്ഥര്‍ തന്നെ മര്‍ദിച്ചെന്നാണ് പേഴ്‌സി ജോസഫ് നല്‍കിയ പരാതിയിലുള്ളത്. 2011 ലാണ് സംഭവം. മര്‍ദനത്തെത്തുടര്‍ന്ന് സ്വകാര്യ ആശുപത്രിയില്‍ കഴിയവെ തൊടുപുഴ എ.എസ്.ഐ കെ.ഐ മുഹമ്മദ് മൊഴിയെടുത്തെങ്കിലും കേസെടുത്തില്ലെന്ന് ചൂണ്ടിക്കാട്ടി പേഴ്‌സി ജോസഫ് തൊടുപുഴ സി.ജെ.എം കോടതിയില്‍ ഹരജി ഫയല്‍ ചെയ്തിരുന്നു. ഇതു റദ്ദാക്കാന്‍ എ.എസ്.ഐ മുഹമ്മദ് നല്‍കിയ ഹരജിയിലാണ് സിംഗിള്‍ ബെഞ്ചിന്റെ ഉത്തരവ്.
2011 ജൂലൈ 27ന് പരാതിക്കാരന്റെ മൊഴി രേഖപ്പെടുത്തിയെന്നും ഉയര്‍ന്ന പൊലിസ് ഉദ്യോഗസ്ഥരുള്‍പ്പെട്ട കേസായതിനാല്‍ മൊഴി എസ്.ഐക്ക് കൈമാറിയെന്നും എ.എസ്.ഐ ഹൈക്കോടതിയെ അറിയിച്ചു. ഇതു ശരിയാണെന്ന് വിലയിരുത്തിയ ഹൈക്കോടതി മുഹമ്മദിനെതിരായ കേസ് നടപടികള്‍ റദ്ദാക്കി. ബാങ്കില്‍ വായ്പ തേടിയെത്തിയ വനിതാ പൊലിസ് കോണ്‍സ്റ്റബിളിന്റെ കൈയില്‍ കടന്നുപിടിച്ചെന്ന പരാതിയിലാണ് പേഴ്‌സി ജോസഫിനെ കസ്റ്റഡിയിലെടുത്തത്.
ഇത്തരം സംഭവം ബാങ്കില്‍ നടക്കാന്‍ സാധ്യതയില്ലെന്ന് ഹൈക്കോടതി വിലയിരുത്തി. വനിതാ പൊലിസ് കോണ്‍സ്റ്റബിളിന് വായ്പ നിഷേധിച്ചതിനെത്തുടര്‍ന്നാണ് മര്‍ദിച്ചതെന്ന് പേഴ്‌സിയുടെ മൊഴിയില്‍ പറയുന്നു. കുറ്റക്കാര്‍ക്കെതിരേ അച്ചടക്ക നടപടി അനിവാര്യമായ ആരോപണമാണിത്. കുറ്റക്കാരെ രക്ഷിക്കാന്‍ ഈ മൊഴി മറച്ചുവച്ചാണ് പൊലിസ് മുന്നോട്ടുനീങ്ങിയത്. ഹൈക്കോടതി പലതവണ ആവശ്യപ്പെട്ടതിനുശേഷമാണ് പരാതിക്കാരന്റെ മൊഴി പൊലിസ് ഹാജരാക്കിയത്.
മൊഴിയുടെ അടിസ്ഥാനത്തില്‍ കേസ് ഇതുവരെ രജിസ്റ്റര്‍ ചെയ്തിട്ടില്ല. തൊടുപുഴ സി.ജെ.എം കോടതിയില്‍ നിലവിലുള്ള കേസിന്റെ വിചാരണക്ക് മൊഴി കൈമാറണമെന്നും മൊഴിയില്‍ കൃത്രിമം കാട്ടാന്‍ സാധ്യതയുള്ളതിനാല്‍ മജിസ്‌ട്രേറ്റ് ഇത് സുരക്ഷിതമായി സൂക്ഷിക്കണമെന്നും ഉത്തരവില്‍ പറയുന്നു.