ന്യൂഡല്‍ഹി: ഇന്ത്യ ഓപണ്‍ സൂപ്പര്‍ സീരീസ് ബാഡ്മിന്റണ്‍ പോരാട്ടത്തിന് ഇന്ന് തുടക്കം. ഇന്ന് മുതല്‍ ഫെബ്രുവരി നാല് വരെയാണ് മത്സരങ്ങള്‍ അരങ്ങേറുന്നത്. ഇന്തോനേഷ്യ മാസ്റ്റേഴ്‌സ് പോരാട്ടത്തിന്റെ ഫൈനലില്‍ കഴിഞ്ഞ ദിവസം കളിച്ച ശേഷം ഇറങ്ങുന്ന 2015ലെ വനിതാ ജേത്രി സൈന നേഹ്‌വാള്‍, നിലവിലെ വനിതാ സിംഗിള്‍സ് ജേത്രി പി.വി സിന്ധു, 2014ലെ കിരീട ജേതാവ് കെ.എം ശ്രീകാന്ത് എന്നിവരാണ് ഇന്ത്യന്‍ പ്രതീക്ഷകള്‍. ഇന്തോനേഷ്യന്‍ പോരാട്ടത്തില്‍ പങ്കെടുക്കാന്‍ സാധിക്കാത്തതിന്റെ നിരാശ തീര്‍ക്കാനൊരുങ്ങിയാണ് ശ്രീകാന്തിറങ്ങുന്നത്. ആദ്യ റൗണ്ടില്‍ ഡെന്‍മാര്‍കിന്റെ സോഫി ഡലാണ് സൈനയുടെ എതിരാളി. സിന്ധു ഡെന്‍മാര്‍ക് താരം തന്നെയായ നതാലിയ റോഡെയെ നേരിടും.