ന്യൂഡല്‍ഹി: മുന്‍ ആസ്‌ത്രേലിയന്‍ ഓള്‍ റൗണ്ടര്‍ ജെയിംസ് ഹോപ്‌സ് ഡല്‍ഹി ഡയര്‍ഡെവിള്‍സിന്റെ ബൗളിങ് പരിശീലകന്‍. പുതിയ സംഘമായി ഈ സീസണില്‍ ഇറങ്ങുന്ന ഡല്‍ഹിയുടെ മുന്‍ താരം കൂടിയാണ് ജെയിംസ് ഹോപ്‌സ്. നിലവില്‍ ബിഗ് ബാഷ് ലീഗില്‍ ബ്രിസ്‌ബെയ്ന്‍ ഹീറ്റിന്റെ ബൗളിങ് പരിശീലകനാണ് ജെയിംസ്. 2005 മുതല്‍ 2010വരെ ഓസീസ് ടീമില്‍ കളിച്ച ജെയിംസ് 84 ഏകദിനങ്ങളും 12 ടി20 മത്സരങ്ങളിലും ദേശീയ ടീമിനായി കളത്തിലിറങ്ങി. അസം സ്വദേശിയായ സുഭാശിഷ് ഘോഷ് ഡല്‍ഹി ടീമിന്റെ ഫീല്‍ഡിങ് പരിശീലകനാകും. ടീമിന്റെ മുഖ്യ പരിശീലകന്‍ ഓസീസ് ഇതിഹാസം റിക്കി പോണ്ടിങാണ്. കൊല്‍ക്കത്ത നൈറ്റ് റൈഡേഴ്‌സിനെ രണ്ട് വട്ടം ഐ.പി.എല്‍ കിരീടത്തിലേക്ക് നയിച്ച ഗൗതം ഗംഭീര്‍ 11ാം അധ്യായത്തില്‍ ഡല്‍ഹിയുടെ ക്യാപ്റ്റനാകും.