കടുത്തുരുത്തി: തെരുവ് നായ്ക്കളുടെ ആക്രമണത്തില്‍ മൂന്ന് ആടുകള്‍ക്ക് പരുക്ക്. കടുത്തുരുത്തി തളിയില്‍ ക്ഷേത്രത്തിന് സമീപം താമസിക്കുന്ന കവിതാഭവനില്‍ ശ്യാമളാ കരുണാകരന്‍, അയല്‍വാസി പാറത്തൊട്ടി കൗസല്ല്യ എന്നിവരുടെ ആടുകളേയാണ് നായ്ക്കള്‍ കടിച്ചു കീറിയത്. ഇന്നലെ പുലര്‍ച്ചെയോടെയാണ് സംഭവം.
ശ്യാമളയുടെ കൂട്ടില്‍ മൂന്ന് ആടുകളാണ് ഉണ്ടായിരുന്നത്. കൂട്ടിലുണ്ടായിരുന്ന  തള്ളയാടിനെ ആക്രമിച്ച നായ്ക്കള്‍ കഴുത്തും ചെവിയുമെല്ലാം കടിച്ചു .അഞ്ച് മാസം പ്രായമുള്ള മറ്റൊരാടിന്റെ കഴുത്തിലും നായ്ക്കള്‍ കടിച്ചു മുറിവേല്‍പിച്ചു. ഈ ആടിന്റെ ചെവിയും നായ്ക്കള്‍ കടിച്ചെടുത്തു. ആടുകളുടെ കരച്ചില്‍ കേട്ട് വീട്ടുകാര്‍ എത്തിയപ്പോള്‍ നായ്ക്കള്‍ ഓടി രക്ഷപെടുകയായിരുന്നു. ശ്യാമളയുടെ വീട്ടില്‍ നിന്നും ശബ്ദം കേട്ട് ഉണര്‍ന്നപ്പോളാണ് കൗസല്ല്യയുടെ കൂട്ടില്‍ കെട്ടിയിരുന്ന ആടിന്റെ കാല്‍ നായ്ക്കള്‍ കടിച്ചതായി കാണുന്നത്.