ജയ്പൂര്‍: ബി.ജെ.പി ഭരിക്കുന്ന രാജസ്ഥാനില്‍ രണ്ട് ലോക്‌സഭാ സീറ്റും ഒരു നിയമസഭാ സീറ്റും ബി.ജെ.പിയില്‍ നിന്ന് വെട്ടിപ്പിടിച്ച് കോണ്‍ഗ്രസ് മുന്നേറ്റം. നിരവധി സംസ്ഥാനങ്ങളില്‍ തെരഞ്ഞെടുപ്പ് അടുത്തിരിക്കെയാണ് കോണ്‍ഗ്രസിന്ന് ഉന്നത വിജയം നേടാനായത്. അജ്മീര്‍, അല്‍വാര്‍ ലോക്‌സഭാ സീറ്റുകളും മണ്ഡല്‍ഗഢ് നിയമസഭാ മണ്ഡലവുമാണ് കോണ്‍ഗ്രസ് ജയിച്ചുകയറിയത്.

അതേസമയം, വിജയത്തില്‍ രാജസ്ഥാന്‍ കോണ്‍ഗ്രസിനെ അഭിനന്ദിച്ച് കോണ്‍ഗ്രസ് അധ്യക്ഷന്‍ രാഹുല്‍ ഗാന്ധി രംഗത്തെത്തി. ഇത് ഓരോരുത്തര്‍ക്കും അഭിമാന നിമിഷമാണെന്നും രാജസ്ഥാനിലെ ജനങ്ങള്‍ ബി.ജെ.പിയെ ഒഴിവാക്കിയെന്നും രാഹുല്‍ പറഞ്ഞു.

മൂന്ന് ഇടങ്ങളിലും ബി.ജെ.പി പ്രതിനിധികള്‍ മരിച്ചതിനെത്തുടര്‍ന്നാണ് ഉപതെരഞ്ഞെടുപ്പ് പ്രഖ്യാപിച്ചത്.

മുഖ്യമന്ത്രി വസുന്ധര രാജയുടെ നേതൃത്വത്തില്‍ ബി.ജെ.പിയും സച്ചിന്‍ പൈലറ്റിന്റെ നേതൃത്വത്തില്‍ കോണ്‍ഗ്രസും ശക്തമായ പ്രചാരണമാണ് തെരഞ്ഞെടുപ്പിനു വേണ്ടി നടത്തിയത്.

ഗോരക്ഷാ വിഷയമാണ് കോണ്‍ഗ്രസ് ഏറ്റവും കൂടുതല്‍ ഉയര്‍ത്തിക്കാട്ടിയത്. മുസ്‌ലിംകള്‍ക്കു നേരെയുള്ള ഗോരക്ഷകരുടെ ആക്രമണങ്ങളില്‍ സര്‍ക്കാര്‍ നടപടിയെടുക്കാത്തതും തെരഞ്ഞെടുപ്പില്‍ വിഷയമായി. പശുവിന്റെ പേരില്‍ അല്‍വാറിലാണ് രാജ്യത്തെ ഏറ്റവും ക്രൂരമായ ആക്രമണം നടന്നത്. 2017 ഏപ്രില്‍ ഒന്നിനായിരുന്നു ഇവിടെ പെഹ്‌ലു ഖാന്‍ എന്ന കര്‍ഷകനെ ഗോരക്ഷാ സേന ക്രൂരമായി കൊലപ്പെടുത്തിയത്.