കൊച്ചി: ബിസിനസ് മേഖലയ്ക്ക് ആഹ്ലാദം നല്‍കുന്നതല്ല അരുണ്‍ ജെയ്റ്റ്‌ലിയുടെ ബജറ്റെന്ന് മേഖലയിലെ പ്രമുഖര്‍. പ്രവാസി സംരംഭകരെ കുറിച്ച് ബജറ്റ് മൗനം പാലിക്കുന്നു. അതേസമയം ബജറ്റിന്റെ പോരായ്മ ചൂണ്ടിക്കാണിക്കുമ്പോഴും കാര്‍ഷിക, അടിസ്ഥാന സൗകര്യ, ആരോഗ്യമേഖലകള്‍ക്ക് ഊന്നല്‍ നല്‍കുന്ന കേന്ദ്രബജറ്റിനെ പ്രമുഖര്‍ സ്വാഗതം ചെയ്യുന്നു.
രാജ്യത്തിന്റെ വളര്‍ച്ചയ്ക്കായി പ്രവാസി സംരംഭകരെ തിരികെ നാട്ടിലേക്ക് കൊണ്ടുവരുമെന്ന് പറയുമ്പോഴും ഇവരുടെ കാര്യത്തില്‍ വ്യക്തമായ ധാരണയില്ലാത്തത് സര്‍ക്കാര്‍ തിരുത്തുമെന്നാണ് പ്രതീക്ഷിക്കുന്നതെന്ന് എം.എ യൂസുഫലി പറഞ്ഞു. പ്രവാസി നിക്ഷേപകര്‍ക്ക് അനുകൂല സാഹചര്യമുണ്ടാകുമെന്ന് പ്രതീക്ഷിച്ചിരുന്നതെങ്കിലും അതുണ്ടായില്ലെന്ന് ലുലു എക്‌സ്‌ചേഞ്ച് ഹോള്‍ഡിങ്‌സ് ആന്‍ഡ് ട്വന്റി 14 ഹോള്‍ഡിങ്‌സ് മാനേജിങ് ഡയറക്ടര്‍ അദീപ് അഹമ്മദ് അഭിപ്രായപ്പെട്ടു.
റോഡ്, റെയില്‍ വികസനത്തിന് നല്‍കിയ മുന്‍ഗണനയും പുതിയ വിമാനത്താവളങ്ങള്‍ നിര്‍മിക്കാനുള്ള പ്രഖ്യാപനവും വ്യവസായമേഖലയിലെ വളര്‍ച്ചയ്ക്ക് പുറമെ ടൂറിസം വികസനത്തിനും അടിസ്ഥാന സൗകര്യ വികസനത്തിനും ആക്കം കൂട്ടും. പത്ത് പ്രധാന ടൂറിസം കേന്ദ്രങ്ങളെ ഐക്കോണിക് സ്റ്റാറ്റസിലേക്ക് ഉയര്‍ത്താനുള്ള തീരുമാനം സ്വാഗതാര്‍ഹമാണെന്ന് അദീപ് അഹമ്മദ് പറഞ്ഞു.
ആരോഗ്യ സംരക്ഷണ പദ്ധതി സ്വാഗതാര്‍ഹമാണെന്ന് ആസ്റ്റര്‍ മെഡിസിറ്റി ചെയര്‍മാന്‍ ഡോ. ആസാദ് മൂപ്പന്‍ പറഞ്ഞു. ബജറ്റ് ജന പ്രീണനമെന്ന് പറയാനാവില്ലെന്ന് ജിയോജിത് ഫിനാന്‍ഷ്യല്‍ സര്‍വിസസ് ചീഫ് ഇന്‍വെസ്റ്റ്‌മെന്റ് സ്ട്രാറ്റജിസ്റ്റ് ഡോ.വി.കെ വിജയകുമാര്‍ പറഞ്ഞു.
ഓട്ടോമൊബൈല്‍, അടിസ്ഥാന സൗകര്യ വികസനം, ക്രെഡിറ്റ് വ്യവസ്ഥകള്‍, ദേശീയപാത നിര്‍മാണം, ഗ്രാമീണ റോഡ് ബന്ധിപ്പിക്കല്‍ തുടങ്ങിയവ ആശാവഹമാണെന്ന്് എം.ജി മോട്ടോര്‍ ഇന്ത്യ എക്‌സിക്യൂട്ടീവ് ഡയറക്ടര്‍ പി.ബാലേന്ദ്രന്‍ പറയുന്നു.
പെട്രോള്‍, ഡീസല്‍ വിലവര്‍ധന തടയാന്‍ നടപടികളില്ലാത്തത് സാധാരണക്കാര്‍ക്ക് എത്രത്തോളം ഗുണകരമാകുമെന്ന് കണ്ടറിയണമെന്ന് പ്രൊഫ. കെ. അരവിന്ദാക്ഷന്‍ വ്യക്തമാക്കുന്നു.
ചികിത്സാ സൗകര്യങ്ങള്‍ക്കായി നീക്കിവയ്ക്കുന്ന തുക മറ്റ് രാജ്യങ്ങളുമായി താരതമ്യം ചെയ്യുമ്പോള്‍ കുറവാണ്. ആരോഗ്യമേഖലയ്ക്കായി നീക്കിവച്ച തുകയില്‍ കാര്യമായ വര്‍ധനവില്ലെന്ന് ഡോ. ബി. ഇഖ്ബാല്‍ അഭിപ്രായപ്പെട്ടു.