തലശ്ശേരി: കല്യാണ വീട്ടിലെ മാലിന്യം ഗുഡ്‌സ് ഓട്ടോയിലെത്തി പൊതു സ്ഥലത്ത് നിഷേപിക്കാനുള്ള നീക്കം നാട്ടുകാര്‍ തടഞ്ഞു. ഇന്നലെ രാവിലെ ഏഴ് മണിയോടെ മഞ്ഞോടി കണ്ടിക്കല്‍ പുഴയോരത്തെ ചിള്ളക്കരയാണ് മാലിന്യം തള്ളാനെത്തിയത.
പള്ളൂരിലെ ഒരു വിവാഹ വീട്ടിലെ മാലിന്യങ്ങളായിരുന്നു ഓട്ടോയിലുണ്ടായിരുന്നത്. മാലന്യം കൊണ്ടു വന്ന കെ.എല്‍ 18 സി. 9720 നമ്പര്‍ ഗുഡ്‌സ് ഓട്ടോയും ഡ്രൈവറെയും നാട്ടുകാര്‍ പിന്നീട് പൊലിസിന് കൈമാറി. ചിള്ളക്കര പ്രദേശത്ത് പതിവായി മാലിന്യം തള്ളുന്നത് മൂലം പരിസര വാസികള്‍ക്ക് വീടുകളില്‍ പോലും നില്‍ക്കാന്‍ പറ്റാത അവസ്ഥയാണ്. ഇവിടെ ഹരിത പുഴയോരം പദ്ധതിയുമായ് നാട്ടുകാര്‍ കുറച്ച് കാലമായി പ്രവര്‍ത്തനം നടത്തി വരികയാണ്. ഇത്തരത്തില്‍ മാലിന്യം തള്ളാനെത്തുന്നവരെ സംഘടിച്ച് നാട്ടുകാര്‍ പിടികൂടുക പതിവാണ്.