കോട്ടയം: രാത്രിയില്‍ കെ.എസ്.ആര്‍.ടി.സി സ്റ്റാന്‍ഡില്‍ ബസ് കാത്തുനിന്ന ട്രാന്‍സ്ജന്‍ഡര്‍ ജസ്റ്റിസ് ബോര്‍ഡംഗത്തെ പൊലിസുകാരന്‍ അപമാനിച്ചതായി പരാതി.
ഈരാറ്റുപേട്ട സ്വദേശിയായ അവന്തിക വിഷ്ണുവിനെ സ്റ്റാന്‍ഡില്‍ ഡ്യൂട്ടിയിലുണ്ടായിരുന്ന സിവില്‍ പൊലിസ് ഓഫിസര്‍ അസഭ്യം പറയുകയും അപമാനിക്കുകയും ചെയ്തുവെന്നാണ് പരാതി.
ശനിയാഴ്ച രാത്രി പത്തരയോടെയായിരുന്നു സംഭവം. സുഹൃത്തിനെ റയില്‍വേ സ്റ്റേഷനിലാക്കിയ ശേഷം നാട്ടിലേക്ക് പോകുന്നതിനായി സ്റ്റാന്‍ഡിലെത്തിയ അവന്തികയുടെ അടുത്തെത്തി കാര്യങ്ങള്‍ അന്വേഷിക്കുകയും അവരെ സ്റ്റാന്‍ഡിനുള്ളിലെ പൊലിസ് എയിഡ് പോസ്റ്റിനുള്ളിലേക്ക് കൂട്ടിക്കൊണ്ടുപോകുകയും ചെയ്തു. അവിടെയെത്തിയപ്പോള്‍ പേരും മേല്‍വിലാസവും നല്‍കാന്‍ ആവശ്യപ്പെട്ടു. എന്നാല്‍, വിവരങ്ങള്‍ നല്‍കാന്‍ അവന്തിക തയാറായില്ല.
ഇതില്‍ ക്ഷുഭിതനായ പൊലിസുകാരന്‍ ഇവരെ അസഭ്യം പറയുകയും ആളുകള്‍ നോക്കിനില്‍ക്കേ കസ്റ്റഡിയില്‍ എടുക്കാന്‍ ശ്രമിക്കുകയുമായിരുന്നുവത്രേ.