കോഴിക്കോട്: ഈ വര്‍ഷത്തെ ജില്ലാതല പ്രവേശനോത്സവം ബാലുശ്ശേരി കോക്കല്ലൂര്‍ ഗവ. എച്ച്.എസ്.എസില്‍ നടക്കുമെന്ന് ഭാരവാഹികള്‍ അറയിച്ചു. നാളെ രാവിലെ 9.30ന് തൊഴില്‍ എക്‌സൈസ് വകുപ്പ് മന്ത്രി ടി.പി രാമകൃഷ്ണന്‍ ഉദ്ഘാടനം ചെയ്യും. പുരുഷന്‍ കടലുണ്ടി എം.എല്‍.എ അധ്യക്ഷനാകും. ചടങ്ങില്‍ എം.കെ രാഘവന്‍ എം.പി മുഖ്യാതിഥിയായിരിക്കും. ജില്ലാ പഞ്ചായത്ത് പ്രസിഡന്റ് ബാബു പറശ്ശേരി പ്രവേശനോത്സവദിന സന്ദേശം നല്‍കും. പാഠപുസ്തക വിതരണോദ്ഘാടനം ജില്ലാ പഞ്ചായത്ത് വൈസ് പ്രസിഡന്റ് റീന മുണ്ടേങ്ങാട്ടും, യൂനിഫോം വിതരണോദ്ഘാടനം ജില്ലാ പഞ്ചായത്ത് വിദ്യാഭ്യാസ സ്റ്റാന്‍ഡിങ് കമ്മിറ്റി ചെയര്‍മാന്‍ മുക്കം മുഹമ്മദും നിര്‍വഹിക്കും.
നവാഗതര്‍ക്കുള്ള കിറ്റ് വിതരണം ബാലുശ്ശേരി ബ്ലോക്ക് പഞ്ചായത്ത് പ്രസിഡന്റ് വി. പ്രതിഭയും നടക്കാവ് ടി.ടി.ഐയുടെ പപ്പറ്റ് സിനിമ 'ന്റെ പാപ്പാത്തി'യുടെ സി.ഡി പ്രകാശനം കോര്‍പറേഷന്‍ വിദ്യാഭ്യാസ സ്റ്റാന്‍ഡിങ് കമ്മിറ്റി ചെയര്‍മാന്‍ എം. രാധാകൃഷ്ണന്‍ നിര്‍വഹിക്കും. വാര്‍ത്താ സമ്മേളനത്തില്‍ ബാബു പറശ്ശേരി, ജില്ലാ പ്രൊജക്ട് ഓഫിസര്‍ കെ. വല്‍സന്‍, പി. പ്രമോദ്,രാജീവന്‍ മാസ്റ്റര്‍, ഷമീര്‍ പങ്കെടുത്തു.