കൊടുവള്ളി: അല്‍ബിര്‍റ് ഇസ്‌ലാമിക് പ്രീ സ്‌കൂളിന് കൊടുവള്ളി പാലക്കുറ്റി ദാറുല്‍ അസ്ഹര്‍ ഖുര്‍ആന്‍ അക്കാദമിയില്‍ നാളെ തുടക്കമാവും. ദാറുല്‍ അസ്ഹര്‍ പ്രസിഡന്റ് പാണക്കാട് സയ്യിദ് അബ്ബാസലി ശിഹാബ് തങ്ങള്‍ രാവിലെ 9.30ന് ഉദ്ഘാടനം നിര്‍വഹിക്കും. സമസ്ത കേന്ദ്ര മുശാവറ അംഗം വാവാട് പി.കെ കുഞ്ഞിക്കോയ മുസ്‌ലിയാര്‍ അധ്യക്ഷനാവും.
ഖുര്‍ആന്‍-ഹദീസ് പഠനത്തോടൊപ്പം അടിസ്ഥാനപരമായ ദിക്‌റുകള്‍, ദുആകള്‍, ഇസ്‌ലാമിക കര്‍മശാസ്ത്രം എന്നിവയിലും ഇംഗ്ലീഷ്, ഗണിതം തുടങ്ങിയ വിഷയങ്ങളിലും ആധുനിക രീതിയിലുള്ള വിദ്യാഭ്യാസമാണ് അല്‍ബിര്‍റ് വിഭാവന ചെയ്യുന്നത്. മൂന്ന് വയസു പൂര്‍ത്തിയാക്കിയ കുട്ടികള്‍ക്കാണു പ്രവേശനം. ആദ്യ ബാച്ചില്‍ രണ്ട് ഡിവിഷനുകളിലായി 48 കുട്ടികള്‍ക്കാണു പ്രവേശനം നല്‍കിയത്. ഇവര്‍ക്കായി ആധുനിക രീതിയിലുള്ള സ്മാര്‍ട്ട് ക്ലാസ് റൂമുകള്‍ ദാറുല്‍ അസ്ഹര്‍ അക്കാദമിയില്‍ ഒരുക്കിയിട്ടുണ്ടെന്ന് കമ്മിറ്റി ഭാരവാഹികള്‍ അറിയിച്ചു.