കൊച്ചി: വിദ്യാര്‍ഥിയെ ജാതിപ്പേരു വിളിച്ച് ആക്ഷേപിച്ചെന്ന പരാതിയില്‍ തിരുവനന്തപുരം ലോ അക്കാദമി മുന്‍ പ്രിന്‍സിപ്പല്‍ ലക്ഷ്മി നായര്‍ക്കെതിരേ രജിസ്റ്റര്‍ ചെയ്ത കേസിന്റെ അന്വേഷണ പുരോഗതി അറിയിക്കാന്‍ ഹൈക്കോടതി സംസ്ഥാന സര്‍ക്കാരിനു നിര്‍ദേശം നല്‍കി. തനിക്കെതിരേ രജിസ്റ്റര്‍ ചെയ്ത കേസ് റദ്ദാക്കാന്‍ ലക്ഷ്മി നായര്‍ നല്‍കിയ ഹരജിയിലാണു സിംഗിള്‍ബെഞ്ചിന്റെ നിര്‍ദ്ദേശം.
ഹരജി തീര്‍പ്പാകുന്നതു വരെ അറസ്റ്റ് ഒഴിവാക്കണമെന്ന് ലക്ഷ്മി നായരുടെ അഭിഭാഷകന്‍ വാദിച്ചെങ്കിലും ഹരജി വീണ്ടും പരിഗണിക്കുന്ന ഈ മാസം 23 വരെ അറസ്റ്റു ചെയ്യില്ലെന്ന് സര്‍ക്കാര്‍ അഭിഭാഷകന്‍ ഉറപ്പു നല്‍കി.
ലോ അക്കാദമി പ്രിന്‍സിപ്പല്‍ സ്ഥാനത്തു നിന്നു താന്‍ രാജിവയ്ക്കണമെന്നാവശ്യപ്പെട്ടു വിദ്യാര്‍ഥി സംഘടനകള്‍ നടത്തിയ സമരത്തെത്തുടര്‍ന്ന് കെട്ടിച്ചമച്ച പരാതിയാണിതെന്നും കേസ് നിലനില്‍ക്കില്ലെന്നും ലക്ഷ്മി നായരുടെ ഹരജിയില്‍ പറയുന്നു. പട്ടികജാതി-പട്ടിക വര്‍ഗ വിഭാഗങ്ങള്‍ക്കെതിരായ അതിക്രമം തടയുന്ന നിയമപ്രകാരം പേരൂര്‍ക്കട പൊലിസാണ് ലക്ഷ്മി നായര്‍ക്കെതിരെ കേസ് രജിസ്റ്റര്‍ ചെയ്തത്.