കൊച്ചി: പാമ്പാടി നെഹ്‌റു കോളജിലെ വിദ്യാര്‍ഥി ജിഷ്ണു പ്രണോയിയുടെ ദുരൂഹ മരണത്തെത്തുടര്‍ന്നു രജിസ്റ്റര്‍ ചെയ്ത കേസിലെ മുഖ്യപ്രതിയായ കോളജ് ചെയര്‍മാന്‍ ഡോ. പി കൃഷ്ണദാസിന് ഹൈക്കോടതി അഞ്ചു ദിവസത്തെ ഇടക്കാല ജാമ്യം അനുവദിച്ചു.
കോളജിലെ പ്രശ്‌നങ്ങള്‍ പരിഹരിക്കാന്‍ കലക്ടര്‍ വിളിച്ച യോഗത്തില്‍ പങ്കെടുക്കേണ്ടതിനാല്‍ മുന്‍കൂര്‍ ജാമ്യം വേണമെന്നാവശ്യപ്പെട്ടു കൃഷ്ണദാസ് നല്‍കിയ ഹരജിയിലാണ് സിംഗിള്‍ ബെഞ്ചിന്റെ ഉത്തരവ്. അഞ്ചു ദിവസത്തേക്ക് ഹരജിക്കാരനെ അറസ്റ്റ് ചെയ്യരുതെന്നും അറസ്റ്റ് ചെയ്താല്‍ ഒരു ലക്ഷം രൂപയുടെ ബോണ്ടുള്‍പ്പെടെ വ്യവസ്ഥകളേര്‍പ്പെടുത്തി ജാമ്യം നല്‍കണമെന്നും ഉത്തരവില്‍ പറയുന്നു. ജനുവരി ആറിനാണു ജിഷ്ണു പ്രണോയിയെ ദുരൂഹ സാഹചര്യത്തില്‍ മരിച്ച നിലയില്‍ കണ്ടെത്തിയത്.