ശ്രീനഗര്‍: ജമ്മു കശ്മീരിലെ സൈനിക കുടുംബ ക്വാര്‍ട്ടേഴ്‌സിനെതിരെ തീവ്രവാദി ആക്രമണം. ഇന്നു രാവിലെയുണ്ടായ ആക്രമണത്തില്‍ മൂന്നു സൈനികർ കൊല്ലപ്പെട്ടു. സൈനികന്‍റെ മകള്‍ക്ക് പരുക്കേല്‍ക്കുകയും ചെയ്തിട്ടുണ്ട്.

രണ്ടു തീവ്രവാദികളാണ് അകത്തു കടന്നതെന്നാണ് കരുതുന്നത്. ഇവരെ കണ്ടെത്താനായിട്ടില്ല. പൊലിസും സൈന്യവും സംയുക്ത തെരച്ചില്‍ നടത്തുന്നുണ്ട്. ക്യാംപിന് 500 മീറ്റര്‍ ചുറ്റളവിലുള്ള സ്‌കൂളുകള്‍ തുറക്കരുതെന്ന് ജില്ലാ ഭരണകൂടം നിര്‍ദേശം നല്‍കിയിട്ടുണ്ട്.

''പുലര്‍ച്ചെ 4.55 നാണ് കടന്നുകയറ്റം ശ്രദ്ധയില്‍പ്പെട്ടത്. ഉടനെ കാവല്‍ക്കാരന്‍ വെടിയുതിര്‍ത്തു. എന്നാല്‍ അവര്‍ തിരിച്ചാക്രമണം നടത്തി. ഒരു ക്വാര്‍ട്ടേഴ്‌സിലാണ് തീവ്രവാദികള്‍. തെരച്ചില്‍ തുടരുന്നു''- ജമ്മു ഐ.ജി എസ്.ഡി സിങ് ജംവാല്‍ പറഞ്ഞു.