മാഡ്രിഡ്: ഇറ്റാലിയന്‍ ടീം നാപോളിയെ കീഴടക്കി നിലവിലെ ചാംപ്യന്‍മാരായ റയല്‍ മാഡ്രിഡ് പ്രീ ക്വാര്‍ട്ടര്‍ ആദ്യപാദത്തില്‍ വിജയം സ്വന്തമാക്കി. 3-1നാണു റയലിന്റെ വിജയം. കഴിഞ്ഞ ദിവസം ബാഴ്‌സലോണയെ പി.എസ്.ജി 4-0ത്തിനു തകര്‍ത്തതിനു ശേഷം അരങ്ങേറിയ പോരാട്ടത്തില്‍ അട്ടിമറി പ്രതീക്ഷിച്ചെങ്കിലും റയല്‍ മത്സരം അതിജീവിച്ചു. കളിയുടെ ഗതിക്കു വിപരീതമായി ആദ്യ ഗോള്‍ നേടിയത് നാപോളിയായിരുന്നു. എട്ടാം മിനുട്ടില്‍ ലീഡ് സ്വന്തമാക്കിയ നാപോളിയെ 18ാം മിനുട്ടില്‍ കരിം ബെന്‍സമ നേടിയ ഗോളില്‍ റയല്‍ ഒപ്പം പിടിച്ചു. പന്നീട് രണ്ടാം പകുതിയുടെ 49ാം മിനുട്ടില്‍ ടോണി ക്രൂസും 54ാം മിനുട്ടില്‍ കസെമിറോയും റയലിന്റെ പട്ടിക പൂര്‍ത്തിയാക്കി.
നാപോളിയുടെ താരമായിരുന്ന അര്‍ജന്റീന ഇതിഹാസം ഡീഗോ മറഡോണ റയല്‍- നാപോളി പോരാട്ടം കാണാന്‍ സാന്റിയാഗോ ബെര്‍ണാബുവില്‍ സന്നിഹിതനായിരുന്നു. മത്സരം 3-1നു റയല്‍ വിജയിച്ചെങ്കിലും രണ്ടാം പോരാട്ടം എവേ ആയതിനാലും നാപോളി കരുത്തരുടെ സംഘമാണെന്നതും നിലവിലെ ചാംപ്യന്‍മാര്‍ക്ക് ഭീഷണിയാണ്. കൂടാതെ എവേയില്‍ ഒരു ഗോള്‍ നേടിയാണു നാപോളി മടങ്ങുന്നതും.