ജിദ്ദ: സഊദിയില്‍ നിന്നുള്ള മടക്കയാത്രയില്‍ എയര്‍ ഇന്ത്യ ബാഗേജ് 45 കിലോ ആക്കി വര്‍ധിപ്പിച്ചതായി ഗള്‍ഫ് മിഡില്‍ ഈസ്റ്റ് ആന്‍ഡ് ആഫ്രിക്ക റീജനല്‍ മാനേജര്‍ മെല്‍വിന്‍ ഡിസില്‍വ അറിയിച്ചു. ആദ്യഘട്ടത്തില്‍ ജിദ്ദയില്‍ നിന്ന് കൊച്ചി, ഹൈദരാബാദ് സര്‍വിസുകള്‍ക്കായിരിക്കും ഈ പരിഗണന. നിലവില്‍ ജിദ്ദയില്‍ നിന്ന് പോകുമ്പോള്‍ 40 കിലോയും തിരിച്ച് വരുമ്പോള്‍ 30 കിലോയുമായിരുന്നു അനുവദിച്ചിരുന്നത്.

ഇതാണ് ഇരുവശത്തേക്കും 45 ആക്കി ഉയര്‍ത്തിയത്. അതേ സമയം, ജിദ്ദയില്‍ നിന്നുള്ള മറ്റു സെക്ടറുകളില്‍ മടക്ക യാത്രയില്‍ ഉള്‍പ്പെടെ 40 കിലോ ലഗേജ് അുവദിക്കുമെന്നും അദ്ദേഹം അറിയിച്ചു.ബാഗേജുകളുടെ വലിപ്പത്തിലോ എണ്ണത്തിലോ നിയന്ത്രണങ്ങളുണ്ടാവില്ല. ഇഷ്ടാനുസരണമുള്ള ബാഗേജ് കൊണ്ടുപോകാനുള്ള അവകാശം യാത്രക്കാര്‍ക്കുണ്ടെന്നും ഡിസില്‍വ കൂട്ടിച്ചേര്‍ത്തു.

അനുമതി ലഭിച്ചാല്‍ കോഴിക്കോട്ടേക്ക് ഏതു നിമിഷവും സര്‍വിസ് നടത്താന്‍ എയര്‍ഇന്ത്യ ഒരുക്കമാണ്. നിലവില്‍ വൈഡ് ബോഡി വിമാനങ്ങള്‍ക്ക് കോഴിക്കോട്ടേക്ക് സര്‍വിസിന് അനുമതിയില്ല. നാരോബോഡി വിമാനങ്ങള്‍ വച്ച് ജിദ്ദയില്‍ നിന്ന് കോഴിക്കോട്ടേക്ക് സര്‍വിസ് നടത്താനാവില്ലെന്നും അദ്ദേഹം അറിയിച്ചു.
അതേസമയം, റിയാദില്‍ നിന്ന് അതു സാധിക്കും. അതുകൊണ്ടാണ് അവിടെ നിന്ന് ആഴ്ചയില്‍ നാലു സര്‍വിസുകള്‍ കോഴിക്കോട്ടേക്ക് ആരംഭിച്ചത്. കേരള ഗള്‍ഫ് സെക്ടര്‍ വളരെ പ്രാധാന്യമേറിയതാണ്. ആഴ്ചയില്‍ 375ഓളം സര്‍വിസുകള്‍ നിലവില്‍ ഈ സെക്ടറില്‍ സര്‍വിസ് നടത്തുന്നുണ്ട്.
അടുത്ത മൂന്നു വര്‍ഷത്തിനകം 23 പുതിയ വിമാനങ്ങള്‍ കൂടി വാങ്ങുമെന്നും അദ്ദേഹം അറിയിച്ചു.