കോഴിക്കോട്: ഭരണകൂടം വ്യാജഏറ്റുമുട്ടലുകള്‍ നടത്തുന്നത് കുത്തകകള്‍ക്കു വേണ്ടിയാണെന്ന് എഴുത്തുകാരി രതീദേവി. എ. വര്‍ഗീസിന്റെ 48-ാം രക്തസാക്ഷി ദിനത്തോടനുബന്ധിച്ച് വര്‍ഗീസ് അനുസ്മരണ സമിതി പൊറ്റമ്മലില്‍ സംഘടിപ്പിച്ച പൊതുയോഗം ഉദ്ഘാടനം ചെയ്യുകയായിരുന്നു അവര്‍.
1,160 ലക്ഷം കോടി രൂപയുടെ ബോക്‌സൈറ്റും മറ്റുമാണ് നിലമ്പൂര്‍ അടക്കമുള്ള വനപ്രദേശങ്ങളില്‍ ഉള്ളത്. വര്‍ഗീസിനെ സ്‌നേഹിക്കാന്‍ ഒരാളും നക്‌സലൈറ്റോ, മാവോയിസ്‌റ്റോ ആവേണ്ടതില്ല.
വര്‍ഗീസ് യുവത്വത്തിന്റെ പ്രതീകമാണ്. എഴുത്തുകാര്‍ക്കെതിരേ രാജ്യദ്രോഹകുറ്റവും യു.എ.പി.എയും ചുമത്തുന്ന പശ്ചാത്തലത്തില്‍ ഇടതുപക്ഷത്തിന് പിന്തുണ നല്‍കിയതില്‍ ഖേദിക്കുന്നുവെന്നും അവര്‍ കൂട്ടിചേര്‍ത്തു. എ.എസ് നാരായണപിള്ള അധ്യക്ഷനായി. എ. വാസു വര്‍ഗീസ് അനുസ്മരണ പ്രഭാഷണം നടത്തി.
രക്തസാക്ഷി അനുസ്മരണത്തിന് കാലമോ, സമയമോ തടസമല്ലെന്ന് എ. വാസു പറഞ്ഞു. കുപ്പുദേവരാജും അജിതയും രക്തസാക്ഷികളായത് നമ്മുടെ മണ്ണിലാണ്.
നക്‌സലൈറ്റ് പ്രസ്ഥാനത്തെ അടിച്ചമര്‍ത്തുമെന്ന് പ്രഖ്യാപിച്ചിട്ടും 50 വര്‍ഷമായിട്ടും സാധിച്ചിട്ടില്ല. നക്‌സലൈറ്റുകളോട് കാട്ടില്‍നിന്നു പുറത്തുവരാന്‍ പറയുന്നത് ജനങ്ങളെ ഒഴിവാക്കി കാട് കൊള്ളയടിക്കാനാണെന്നും അദ്ദേഹം ഓര്‍മിപ്പിച്ചു.
റോയല്‍ ഇന്ത്യന്‍ നേവി കലാപത്തിലെ പോരാളി ഒ.കെ വാസുദേവനെ ആദരിച്ചു. വ്യാജ ഏറ്റുമുട്ടലിന്റെ രാഷ്ട്രീയം എന്ന സെമിനാറില്‍ സി.കെ അബ്ദുല്‍ അസീസ് വിഷയം അവതരിപ്പിച്ചു. കെ.എസ് ഹരിഹരന്‍, പി. അമ്പിക, മുസ്തഫ കൊമ്മേരി, മോയിന്‍ ബാപ്പു, അഡ്വ. സുധാകരന്‍, എം.വി കരുണാകരന്‍, കുഞ്ഞിക്കോയ, ബീരാന്‍കോയ പങ്കെടുത്തു.
ഗ്രാ തീയറ്റര്‍ ഗ്രൂപ്പിന്റെ ദൃശ്യാവിഷ്‌കാരവും ഗാനാലാപനവും നടന്നു.