ന്യൂഡല്‍ഹി: താജ്മഹലിന്റെ നിറം മങ്ങുന്നതിനെ തുടര്‍ന്ന് ദേശീയ ഹരിത ട്രൈബ്യുണല്‍ ഉത്തര്‍പ്രദേശ് സര്‍ക്കാരിന് ഇരുപത് ലക്ഷം രൂപ പിഴ ചുമത്തി.

ആഗ്രയുടെ തീരത്ത് മുന്‍സിപ്പാലിറ്റി ഖര മാലിന്യങ്ങള്‍ കൂട്ടിയിട്ട് കത്തിക്കുന്നെന്ന എന്‍ജിഒ സംഘടനകളുടെ ആരോപണത്തില്‍ മറുപടി നല്‍കാത്തതിനെ തുടര്‍ന്നാണ് പിഴ ചുമത്തിയത്. വ്യക്തമായ മറുപടി നല്‍കാത്ത സര്‍ക്കാര്‍ ഉദ്യോഗസ്ഥര്‍ ഓരോരുത്തരും ഇരുപതിനായിരം രൂപ വീതം പിഴ ഒടുക്കണമെന്നും നിര്‍ദേശിച്ചിട്ടുണ്ട്. ജസ്റ്റിസ് സ്വതന്ത്രര്‍ കുമാര്‍ അധ്യക്ഷനായ ബെഞ്ചാണ് ഹരജി പരിഗണിച്ചത്.

കാര്‍ബണ്‍ പുകപടലവുമായി കലര്‍ന്ന് താജ്മഹലില്‍ പതിക്കുന്നതാണ് നിറം മാറ്റത്തിന് കാരണമെന്നാണ് പഠനത്തില്‍ കണ്ടെത്തിയത്. എന്‍.ജി.ഒ സംഘടനകളുടെ ഹരജിയെ തുടര്‍ന്ന്, താജ്മഹലിന് സമീപം പ്രവര്‍ത്തിക്കുന്ന കമ്പനികളുടെ പ്രവര്‍ത്തനം നിര്‍ത്തിവെക്കാനും കോടതി നിര്‍ദ്ദേശം നല്‍കിയിട്ടുണ്ട്.