കൊച്ചി: സമസ്ത കേരള ജംഇയ്യത്തുല്‍ ഉലമ സീനിയര്‍ വൈസ് പ്രസിഡന്റായിരുന്ന ചെമ്പരിക്ക ഖാസി സി.എം അബ്ദുള്ള മൗലവിയുടെ കൊലപാതകവുമായി ബന്ധപ്പെട്ട് സി.ബി.ഐ, പി.ഡി.പി സംസ്ഥാന സെക്രട്ടറി നിസാര്‍ മേത്തറുടെ മൊഴി രേഖപ്പെടുത്തി. എറണാകുളം സി.ബി.ഐ ഓഫിസില്‍ വിളിച്ചുവരുത്തി രണ്ടുമണിക്കൂറിലേറെ സമയമാണ് മൊഴി രേഖപ്പെടുത്തിയത്.
2014 നവംബര്‍ 28ന് കാസര്‍കോട്ടുള്ള ഒരു യുവജനനേതാവിന്റെ വീട്ടില്‍ ഖാസിയുടെ കൊലപാതകികള്‍ അഭയം തേടിയെത്തിയതായി തനിക്ക് ഒരു സുഹൃത്ത് മുഖാന്തരം വിവരം ലഭിച്ചതായി നിസാര്‍ മേത്തര്‍ സി.ബി.ഐ ഉദ്യോഗസ്ഥര്‍ക്ക് മൊഴി നല്‍കി. ഇത് സംബന്ധിച്ച ഓഡിയോ റെക്കോഡും സി.ബി.ഐക്ക് സമര്‍പ്പിച്ചു.